ЯҢАЛЫКЛАР

2014 ел Россиядә Мәдәният елы дип игълан ителде. Бу ел мәдәният өлкәсенә нинди яңалыклар алып килер? Район мәдәният дөньясын нинди үзгәрешләр көтә?
Хисап җыелышында район мәдәният идарәсе җитәкчесе Илнур Котдусов 2013 елда башкарылган эшләр, ирешелгән уңышлар, чишелмичә калган кайбер җитешсезлекләр белән беррәттән, Мәдәният елына билгеләнгән бурычлар белән дә таныштырды.

“Ватан” агрофирмасы” ширкәтенең хисап җыелышы башланыр алдыннан кунакка чакырылган хезмәт ветераннары Вил Сәлахов һәм Рәшит Зәйнәгытдинов белән аралаштык. Шушы хуҗалыкта берсе механизатор, икенчесе шофер булып эшләп, лаеклы ялга чыкканнар.

“Ак Барс–агро” (хәзер “Ак барс” агрокомплексы”) ширкәте төзелүгә быел ун ел тула икән. Әле кайчан гына муниципаль район башлыгы Алмас Назиров колхозчылар җыелышында районга инвесторлар киләчәге, бу зонадагы өч хуҗалыкны “Ак барс” холдинг компаниясе алырга теләк белдерүе турында сөйләгән иде. Вакыт бик тиз уза, әмма ул бик яхшы хөкемдар.

Бөтен гомерен иген үстерүгә багышлаган, быел 50 яшьлек юбилеен билгеләп үтәргә әзерләнүче Әхәт Шәрәфиев өчен узган елның иң истәлекле вакыйгасы — улы Рәмиснең Аланга, туган нигезгә кайтып, “Курса МТСы” ширкәтендә эшкә урнашуы була. Күпләр балаларын шәһәргә озатырга ашкынган заманда малаеның авылда калуына сөенүе гаҗәп тә кебек. Ләкин Курса җирлегендә яшәүчеләр арасында андыйлар шактый икән.

Әңгәмәдәшебез — район үзәк хастаханәсе онкологы, хирург Илшат ИБӘТУЛЛИН.
— Илшат Ришатович, онкология чирләре соңгы вакытта кешелекне куркытып торучы афәткә әверелде.
— Рактан куркырга кирәкми. Иң мөһиме — үз организмыңа игътибарлы булу сорала. Дөрес тукланырга, күп хәрәкәтләнергә, тәмәке тарт-маска, спиртлы эчемлекләр белән мавыкмаска, даими медицина тикшерүе үтәргә киңәш ителә. Мәсәлән, Япониядә эш урынында елына ике тапкыр медицина тикшерүе үтәләр. Үтми икән, хезмәткәр эштән китәргә мәҗбүр була. Бездә дә һәр эш урынында шундый таләп куелса, җитди чирләр алдан ачыкланыр иде. Диспансерлаштыру программасы быел тагын да камилрәк эшләр, дип планлаштырыла. Узган ел районда 7 мең 551 кеше диспансерлаштыру узды. 250 кешегә, онкология чиренә шик белдерелеп, аларга яңадан җентекләп тикшерү үткәрелде. Шуның 56сы республика онкология клиникасына җибәрелде, 4сендә, яман шеш башлангыч чорда, 1, 2нче стадиядә ачыкланды һәм алар уңышлы дәвалану курсы узды.

2008 елның 25 декабрендәге 273–ФЗ номерлы “Коррупциягә каршы тору турында”гы Федераль Закон, Татарстан Республикасының 2006 елның 4 маендагы 34–ЗРТ номерлы “Татарстан Республикасында коррупциягә каршы тору турында”гы Закон нигезендә һәм 2013 елның 25 декабрендәге 1610нчы номерлы Арча район башкарма комитеты карары белән 2014 елга Арча муниципаль районының Коррупциягә каршы максатлы программаны тормышка ашыру максатыннан, дәүләт власте органнарында, җирле үзидарәләрдәге вазифаи затларның коррупцияләнгән булуы турындагы барлык билгеле фактлар һәм Арча муниципаль районында коррупция белән бәйле хокук бозулар турында 8(84366) 3–13–23 номеры буенча хәбәр итә аласыз (җаваплы Д.З.Абдуллин).

31 гыйнварда Арча район Советының икътисадый үсеш, авыл хуҗалыгы һәм әйләнә–тирә мохитне саклау һәм бюджет–финанс мәсьәләләре буенча даими комиссияләрнең берләштерелгән утырышы булды. Аны муниципаль район башлыгы урынбасары Любовь Осина алып барды.

«Шәхси мәгълүматлар турында»гы Федераль закон нигезендә, шәхси мәгълүматлар эшкәртүне башкарып та, Шәхси мәгълүматларны эшкәртү Реестрында теркәлмәгән операторлар ТР буенча Роскомнадзор идарәсенә белдерү хаты җибәрергә тиеш (Гарифҗанов урамы, 28а йорт, Казан, 420138, а/я 25). Роскомнадзор шулай ук реестрда 2011 елның 1 июленә кадәр теркәлгән операторлар өчен оператор турындагы мәгълүматларга узгәрешләр кертү турындагы документ формасының гадиләштерелүе турында хәбәр итә. Шул ук вакытта операторлар Роскомнадзорга мәгълүматлар узгәрү турында 2013 елның 1 гыйварына кадәр итәргә тиешләр иде. Тулырак мәглүмат – http://16.rkn.gov.ru/ сайтында.

Җылы көннәре белән гаҗәпләндереп башланган гыйнвар зәмһәрир суыклары белән тәмамлана. Апаз, Шушмабаш якларында салкыннар 38 градуска җиткән. Шунысы әйбәт — өйләребез җылы. Төннәр буе мичкә ягып чыккан чорлар да бар иде бит. Күп фатирлы йортларга аерым газ казаннары кую да шәп булды.

Кышкы спорт төрләрен яратучылар өчен салкыннар да куркыныч түгел. Температура 25 градустан да түбән булуга карамастан, чаңгычылар Арча стадионына ярышка җыелды. Бу көнне биредә Фәнил Гарәфиев истәлегенә багышлап чаңгыда узышлар үткәрелде.