ФОТОРЕПОРТАЖЛАР

Арча шәһәрендә Бөек Җиңү көне-2023

Күлтәс авыл китапханәсендә башлангыч сыйныф укучылары өчен «Кояшта кунакта» дип аталган мәгълүмати - танып белү сәгате узды. Китапханәче балаларга кояш көненең кайчан барлыкка килүе һәм бу бәйрәмнең җәмәгатьчелекнең игътибарын кояш энергиясен куллану мөмкинлекләренә һәм табигый ресурсларны саклауга җәлеп итү максаты белән уйлап чыгарылуы турында әйтте. "Кояш" слайд-презентациясен кулланып, укучыларга кояшның төзелеше, зурлыгы, температурасы һәм безнең җиребез тормышында аның бәхәссез роле турында сөйләде, аннары йолдызыбыз турында кызыклы фактлар хәбәр итүче видеороликлар күрсәтте.

Кушлавыч авыл китапханәсендә «Чернобыль фаҗигасы кабатланмасын!» исеме астында мәгълүмат сәгате үткәрелде. Чара башында китапханәче балаларга кешелекнең техник прогрессы өчен түләүгә әйләнгән иң куркыныч экологик фаҗигаларның берсе турында сөйләде. Укучылар фаҗига масштаблары, радиация аркасында барлыкка килгән төрле авырулар, экологик катастрофа нәтиҗәләре, радиация йоктыруга каршы көрәш чаралары турында белделәр. Документаль фильмны карау 1986 елгы экологик һәлакәтнең масштабларын ачык күрсәтергә, ЧАЭСтагы авариядән соң экологик проблемаларны тирән һәм якты итеп яктыртырга мөмкинлек бирә.

Яңа Сала авыл китапханәсендә «Ромашка» балалар бакчасына йөрүче нәниләр белән ачык һавада «Табигать – тиңсез хәзинә» дигән экологик сәгать уздырды. Нәни дусларыбыз белән туган як табигатенең матурлыгы турында фикерләр алыштык.Китапханәче Россиянең үсемлек һәм хайваннар дөньясының байлыгын ачучы китаплар буенча күзәтү үткәрде. Чара барышында балалар табигать турында шигырьләр, урман турында мәкальләр ишеттеләр. Нәни дусларыбыз агачлар, кошлар, кыр чәчәкләре, хайваннар турында табышмакларны чишүдә актив катнаштылар. Табигатьтә үзеңне ничек тотарга кирәклеге турында киңәшләр бирдек.

Экологик тәрбия максатыннан Курса Почмак авыл китапханәчесе 3 май көнне чишмә янына агач утырту һәм чәчәкләр утырту эшләре башкарды. Шулай ук, бу экологик тәрбия максатыннан оештырылган чарада Курса Почмак гомум белем бирү мәктәбе укучылары да актив катнашты. Агач утырту,аларга су сибү эшләрен аерым максат куеп башкардылар.Һәр агачны утыртканда “Украинада махсус операциядә катнашучы егетләребез исән - имин әйләнеп кайтсыннар иде”, дип теләкләр теләделәр.

Югары Бирәзә авыл китапханәсендә китап укучылар белән «Без-табигать дуслары» исемле экологик викторина үткәрелде. Әлеге чара вакытында табигатьне саклау, яклау турында шигырьләр укылды,тылсымлы тартмадан сорауларга җавап табылды. «Табигать һәм кеше» исемле китап күргәзмәсе аша балалар, без табигатьнең, үзебез сулый торган һаваның кечкенә ярдәмчеләре, дигән нәтиҗә ясадылар.