АТ Көне

“Күңел диңгезе” эбру техникасы буенча арт-терапевтик мастер-класс Китапханәдә “Актив озын гомер” проекты кысаларында “Күңел диңгезе” дип аталган эбру техникасы буенча арт-терапевтик мастер-класс узды. Китапханәче көнчыгышта барлыкка килгән әлеге борынгы техника турында сөйләде. Практик өлеше тагын да кызыклы һәм мавыктыргыч узды. Закирова Р.Н. катнашучыларның барысын да әлеге үзенчәлекле сәнгать төренең нечкәлекләренә өйрәтте. Чара яшь буын белән өлкән буынны бергә берләштерде: балалар әбиләренә булышты, актив рәвештә әлеге сәнгатьнең сокландыргыч шедеврларын иҗат иттеләр. Һәр катнашучы үзенең иҗатына үз куллары белән бергә күңел җылысын, күтәренке кәефен, хисләрен салды. Бик матур , үзенчәлекле картиналар барлыкка килде. Ахырдан һәркем үзенең иҗат җимешләрен истәлеккә алып кайтып китте.

Арча үзәк китапханәсе хезмәткәрләре Россиядә халыклар бердәмлеге елы, бердәм фольклор көне уңаеннан, “Татарстанда Җәй” проекты кысаларында Габдулла Тукай исемендәге Арча педагогика көллияте каршында оештырылган татар теле буенча сөйләм практикасы үстерү юнәлешендәге «Без – Тукай оныклары» төбәкара җәйге ял аланында тәрбияләнүче балалар өчен “Үткәнен белмәгән халыкның киләчәге юк” исемле халык уеннарыннан торган уенчат уздырдылар. Һәрбер кеше үз халкының үткәнен, бабайларының ничек көн иткәнен, ниләр белән шөгельләнгәнен, гореф-гадәтләрен, йолаларын белергә тиеш. Алып баручылар милли киемнәрдән балаларны сәламләде, уенчатның тәртибе белән таныштырып уздылар. Катнашучылар командаларга бүленеп, рус, татар, кавказ, төньяк халыкларының милли гореф гадәтләре, йолалары, уеннары белән танышып милли станцияләрдә төрле биремнәр үтәделәр. Һәр үтәгән бирем өчен командаларга төрле төстәге тасмалар бирелде. Ахырдан барлык командаларның әйдәп баручылары “бердәмлек тасмасын” тулы бер толым итеп үрделәр, зур түгәрәк ясап әйлән-бәйлән йөрделәр.