Бүген Үзәк китапханәдә Бөтендөнья кулланучылар хокукларын яклау көненә багышланган очрашу узды. Чараның кунагы, Татарстан Республикасы Дәүләт алкоголь инспекциясенең Арча территориаль органының эчке базарны үстерү һәм координацияләү бүлеге башлыгы Абдуллина Ләйсән Илсуровна катнашучыларны РФ «Кулланучылар хокукларын яклау турында»гы законы белән таныштырды. Ул сатып алучыга һәм сатучыга теге яки бу ситуациядә үзеңне ничек тотарга кирәклеген һәм киңәшләрен бирде. Чарада кулланучылар хокуклары турында күп яңа һәм файдалы мәгълүмат алынды. Ә үз хокукларыбызны, алардан файдалана белү безнең кулланучылар хокуклары бозылган очракта килеп чыга торган конфликтлы ситуацияләрне оператив хәл итәргә мөмкинлек бирә.

14 нче мартта Арча үзәк китапханәсендә шигърияткә, моңга гашыйк, Чиләбе өлкәсендә яшәп иҗат итүче яшь шагыйрә, “Оча алам”, “Үзгәрдең” шигырь җыентыклары авторы, бард Оксана Ильюп белән күптән көтелгән “Гитараның кылларына гашыйк җаным” исемле искиткеч җылы очрашу узды.

Президентның Мәдәни инициативалар Фонды ярдәме белән Татарстан Республикасында Бөек Ватан сугышы вакытында Советлар Союзының төрле почмакларыннан эвакуацияләнгән балалар турында документаль фильм төшерелде. Өч ел элек нәкъ менә бу темага хәрби вакыйгаларның шаһитларының хикәяләре буенча «Мин сине сагынам. Я по тебе скучаю» нәфис фильмы төшерелде. Тик күп кенә сораулар калды. Аларга җавапны сугыш елы балалары, аларның балалары шул елларны искә алган документаль фильмда табарга була. Бу документаль фильм бүген безнең виртуаль концерт залында күрсәтелде. Аны караганнан соң, тамашачылар оештыручылар, төп геройлар белән очрашу һәм алар белән аралашу бәхетенә иреште.