Үзәк китапханәдә Арчаның 5 нче гимназиясенең 10 нчы сыйныф укучылары өчен «Тормышта дөрес һөнәр сайлау» дигән темада чара уздырылды. Очрашуда өлкән сыйныф укучылары иң актуаль темаларның берсе булган – тормышта үз күңелеңә якын дөрес һөнәр сайлау, алда торган каршылыклар турында сөйләштеләр, файдалы мәглүматлар алдылар. Китапханәче чараны киләчәктә һөнәр сайлауның катлаулылыгы һәм җаваплылыгы турындагы әңгәмә белән башлады. Мәктәптән соң сайлаган юлның бөтен тормышка йогынты ясавын ассызыклады, укучыларны үзләренә, кызыксынуларына һәм сәләтләренә карап дөрес һөнәр сайларга чакырды. Очрашу кысаларында мәктәп укучылары өчен китап күргәзмәсенә күзәтү тәкъдим ителде, анда психология, үз-үзеңне үстерү һәм һөнәри юнәлеш бирү буенча китаплар тупланган иде. Укучылар үз кызыксынуларына ярдәм итәрдәй, хезмәт базарының заманча структурасын белүдә мүгълүмат бирердәй әдәбият белән таныштылар. Чараның практик өлешен белгечләр – «Мәрхәмәтлек үзәге» гаиләгә һәм балаларга социаль ярдәм күрсәтү бүлеге психологы Нуриева Резеда һәм социаль эшләр буенча белгеч Хисамова Роза Мансур кызы үткәрделәр. Алар психологик тренинг оештырдылар, анда укучылар үзләренең көчле якларын, кызыксынуларын һәм сәләтләрен ачыклауга юнәлдерелгән күнегүләр башкардылар. Интерактив формада мәктәп укучылары үз теләкләрен анализларга, һөнәрләргә карата булган таләпләр белән таныштылар. Очрашу ачык диалог форматында узды, бу өлкән сыйныф укучыларына файдалы мәгълүмат кына түгел, ә борчыган сорауларына җаваплар табарга да ярдәм итте. Мондый очрашып аралашулар үсмерләргә киләчәктә дөрес профессия сайлау өчен бик файдалы.

6 апрель көнне Арча балалар сәнгать мәктәбендә «Королевская история длиною 2 000 лет» дип исемләнгән орган концерты узды. Россия Федерациясенең атказанган артисткасы, Самара дәүләт филармониясе солисты Людмила Геннадьевна Камелина (орган) искиткеч әсәрләр башкарып кына калмыйча, музыка уен кораллары короле - орган турында мавыктыргыч тарихлар белән уртаклашты. Концертта Н.Г. Җиһанов исемендәге Казан дәүләт консерваториясенең вокаль сәнгать кафедрасы укытучысы Айсылу Сәлмәнова, Казан шәһәренең «9 нчы балалар сәнгать мәктәбе» коллективлары һәм солистлары, шулай ук Арча балалар сәнгать мәктәбенең «скрипка» классы укучысы - Кадыйрова Диана (укытучысы Ганиева А.И.). катнаштылар. Матур классик концертын күрү, ишетү мөмкинлеге һәм үсеп килүче буынны тәрбияләүгә зур өлеш керткәнегез өчен сезгә олы рәхмәтебезне җиткерәбез.

Бүген китапханәбездә Арчаның 2 нче номерлы балалар бакчасы педагогик коллективы һәм китап укучылар белән берлектә 2026 елда бөек татар шагыйре Габдулла Тукайның тууына 140 ел тулу уңаеннан, Татарстанда «Тукайны бергәләп укыйбыз. Читаем Тукая вместе» дип исемләнгән республикакүләм проекты кысаларында Габдулла Тукайның «Миллли моңнар» - «Национальные мелодии» шигыре белән таныштык. Чарада шигырьне татар һәм рус телләрендә укып анализ ясалды, һәр строфага тукталып, шагыйрь әйтергә теләгән фикерләр ачыкланды. Чарада катнашучыларга шигырьне русчага тәрҗемә иткән совет чоры язучысы Вероника Тушнова турында мәгьлүмат бирелде. Аның Г.Тукай иҗатын бик яратуы турында ассызыкланды. «Милли моңнар» шигырен нәфис сүз остасы, Татарстан Республикасының халык артисты, Г.Тукай исемендәге Дәүләт премиясе лауреаты Илдус Әхмәтҗанов сөйләвендә әзерләнгән видеоролик күрсәтелде. Татар Дәүләт камера хоры башкаруында шигырьнең “Зиләйлүк” көенә язылган җыр тыңланды. Шулай ук очрашуда китап укучыларны кызыксындырган сорауларга җаваплар бирелде, фикерләр уртаклашуга корылган җанлы әңгәмә оештырылды. Габдулла Тукайның тормыш юлы, иҗаты белән бәйле аз билгеле булган мәгьлүматлар китап укучыларның Г.Тукай турында күзаллауларын киңәйтте, иҗатына кызыксынуны арттырды.

Арча муниципаль районы мәдәният учреждениеләре хезмәткәрләре Хезмәтне саклау елы кысаларында Татарстан Профсоюзларында “Мәдәнияттә куркынычсызлык сәнгате” дигән тематика астында уздырылган КВИЗның Республикакүләм уен-викторинага кушылдылар. Арча үзәк китапханәсенә районның Мәдәният йорты, “Казан арты” тарих-этнография музее, Балалар сәнгать мәктәбе һәм Үзәк китапханә вәкилләреннән тупланган командалар җыелды. Уздырылган чара мавыктыргыч ярыш форматында узды. Уенда катнашучылар хезмәтне саклауга кагылышлы сорауларга җаваплар бирделәр. Командаларның белем дәрәҗәләрен бәяләү өчен жюри сайланды. Интелектуаль уенның һәр раундында команда әгъзалары белем дәрәҗәләрен күрсәттеләр, бер-берсенә ярдәм итеп, тәҗрибә уртаклаштылар. Чара ахырында уен нәтиҗәләре белән жюри таныштырды, командаларга дипломнар һәм истәлекле бүләкләр тапшырылды. КВИЗ җылы һәм кунакчыл атмосферада узды. Иң мөһиме, катнашучылар яңа белемнәр алдылар, белгәннәрне искә төшерделәр. Бу катнашучыларга ныклы профессиональ белемнәргә ия булып, үз эшеңә җаваплылык белән караганда мәдәниятнең куркынычсыз өлкә булуын аңларга ярдәм итте. Шулай ук, уен җитди теманың кызыклы, заманча һәм илһамландыргыч чарага мөмкин бирүенә ачык мисал булды.