Бүген Үзәк китапханәдә Халыкара Холокост корбаннарын искә алу көне уңаеннан хәтер дәресе узды. Чарада Арча гуманитар-техник техникумы студентлары катнашты. Хәтер дәресе кешелек тарихының иң фаҗигале сәхифәләрен яктыртуга багышланган иде. Китапханәче Холокостта барган тарихи вакыйгалар турында сөйләде, бу хәлләр кешелек тарихы битләренә иң куркыныч чор булып керүен ассызыклады. Очрашу кысаларында студентлар өчен ул еллардагы вакыйгаларны яктырткан тематик әдәбият һәм сәнгать әсәрләрен үз эченә алган китап күргәзмәсе тәкъдим ителде. Чараның йомгаклау өлешендә студентлар тарихи вакыйгага карата шәхси хис-кичерешләре белән уртаклаштылар.

Арча балалар сәнгать мәктәбенең «Decadance» бию коллективы (кече төркем) Казанда узган Халыкара «Шаг на сцену» бәйге-фестивалендә «Җирнең иң яхшы шәһәре» биюе белән чыгыш ясап 1 нче дәрәҗә Лауреат дипломына лаек булды. Җитәкчесе Солтанова Динә Эльмир кызы «Һөнәри осталык» дигән диплом белән бүләкләнде.

С.Сәйдашев исемендәге зур концертлар залында «Звезды из завтра»дип аталган яшь музыкантлар өчен Республикакүлəм иҗади проекты лауреатларының гала-концерты булды. Концертта Арча балалар сәнгать мәктәбеннән - «Күңелле балачак» вокаль ансамбле (җитәкчеләре Ганиева А.И., Зиннатуллина Р.Р.) Татарстанның həм Россиянең атказанган сәнгать эшлеклесе,Татарстанның халык артисты, Г.Тукай исемендәге Дәүләт премиясе лауреаты Рөстәм Абязов җитәкчелегендәге «La Primavera» камера оркестрына кушылып чыгыш ясады. Котлыйбыз! Яңадан яңа үрләр яулавыгызны теләп калабыз.

Арча балалар сәнгать мәктәбенең рәсем бүлеге укучысы Габидуллина Регина Казанда узган «Кышкы палитра 2026» Республика балалар сәнгать иҗаты бәйгесендә катнашып 1 нче дәрәҗә Лауреат дипломын яулады. Җитәкчесе Фәтхуллина Р.Д.