Бүген без, Үзәк китапханә хезмәткәрләре, Инвалидлар декадасы кысаларында Арча картлар һәм инвалидлар интернат йортында булдык. Бу изге йортта тәрбияләнүче сәламәтлекләре чикле кешеләргә йөрәк җылыбыз белән сугарылган җылы сүзләребезне, шигырьләребезне, җырларыбызны җиткердек. “Хәтер тартмасы” дигән уенда инвалидлар үзләре дә бик теләп катнаштылар, сорауларга җаваплар бирделәр, зирәклекләрен, тапкырлыкларын күрсәттеләр. Бергәләп “Безне нәрсә көчле итә?” - дигән сорауга җавап тапканнан соң, китапханәчеләр мастер-класс оештырдылар. Инвалидлар кәгазьдән йөрәк кисеп аны бизәү эшен бик теләп башкардылар. Ә соңыннан барлык йөрәкләрне бер зур йөрәккә ябыштыру аеруча күңелләрне йомшартты. Чөнки бу изге йортта тәрбияләнүчеләр дә, аларны тәрбияләүчеләр дә бер уй, бер теләк, уртак хисләр, кайгы-сагышлар, шатлык-куанычлар белән яшәвен барысы да яхшы аңлый. Бүгенге очрашу бу йортта тәрбияләнүчеләрнең күңелләрен күтәрде, чын бәйрәм төсмере бирде. Җырга, моңга, аралашуга сусаган ак әбиләр, олы хөрмәткә лаек бабайлар рәхәтләнеп ял иттеләр, үзләре дә күңел ачтылар. Инвалидларыбыз бик канәгать калдылар, рәхмәт әйтеп саубуллаштылар.

Бүген китапханәбездә ААПК студентлары өчен Билгесез солдат һәм Ватан Геройлары көненә багышланган Хәтер көне үткәрелде. Кичәдә кунак буларак безнең заман геройлары – СВОда катнашучылар Исмәгыйлев Л.Г., Садиров В.К., Нуриязданов Р.Д., Галимов Р.Н., «Җиңү волонтерлары» инициатив төркемен оештыручыларның берсе, Арча муниципаль районының «Ватанны саклаучылар» СВОда катнашучыларга ярдәм фондының социаль координаторы Латыйпова А. И. катнашты. Чарада кунаклар үз тормышлары турында сөйләделәр, СВО зонасында хәрби хезмәт турындагы истәлекләре белән уртаклаштылар.Ихлас чыгышлар студентлар күңелендә тирән хисләр уятты. Волонтер Латыйпова А.И. кызы чыгышыннан соң студентлар җирле активистларның бик игелекле хезмәт башкарулары белән таныштылар. Чара кунаклары әңгәмәдә актив катнаштылар, кызыксынган сорауларын биреп, җаваплар алдылар. Кичә музыкаль-шигъри чыгыш белән тәмамланды. Ватанга мәхәббәт һәм барлык чор геройларына рәхмәт хисләре белән сугарылган шигырьләр һәм патриотик җырлар тыңлау яшь буында Ватанга мәхәббәт,патриотик хисләр уятты. Бу очрашу буыннар дәвамчанлыгын ныгытуда, яшь буынны патриотизм рухында тәрбияләүдә, тарихи мирасны хөрмәт итәргә өйрәтүдә бик уңышлы булды.

Арча балалар сәнгать мәктәбенең фортепиано классы укучысы Мөхәмәдиярова Диана Казанда узган «SFORZANDO» Халыкара музыкаль премиясендә катнашып 3 нче дәрәҗә Лауреат дипломына лаек булды. Укытучысы Рәхмәтуллина Эльвира Фаят кызы.

Бүген китапханәбезнең уку залында Халыкара Әниләр көне уңаеннан “Күңелем тулы ачкыч” дигән ачыкта-ачык сөйләшүгә, аралашуга корылган әдәби-музыкаль кичә узды. Кичәгә районыбызның Шәрәфле гражданины, Мөслимәләр берлеге җитәкчесе, Арча мөхтәсибәтендә укыту эшләре буенча җитәкче Рая Фәтхуллина, Пешәнгәр авылыннан “Каурый каләм” әдәби-иҗат берләшмәсе әгъзасы, шигырьләр, җырлар авторы Рания Галәветдинова, социаль яклау оешмасыннан гаиләләр белән эшләү белгече Ильвина Мәүлиева, Татарстан Республикасының Атказанган мәдәният хезмәткәре, гомерен халыкны культура-агарту эшенә багышлаган, ”Яшь йөрәкләр” халык вокал ансамбле җитәкчесе Нәсимә Гарифуллина, Наласа авылы китапханәчесе, киң кырлы тырыш ханым Гөлчәчәк Сабирҗанова, врач невролог, “Аль-шифа” матурлык һәм сәламәтләндерү салоны җитәкчесе Диляра Каратай чакырылган иде. Бәйрәм кичәсендә Әниләр көне тарихы тудында мәгълүмат бирелде. Кунаклар алып баручы тарафыннан әзерләнгән сорауларга тулы, файдалы җаваплар бирделәр, мастер-класслар уздырдылар. Әдәби-музыкаль кичәдә “Яшь йөрәкләр” халык вокал ансамбле чыгышы, җырчылар Фәния Сабирҗанова (баянда Вилорик Зыятдинов), Дамир Шакиров (баянда Вилорик Зиятдинов), Гөлчәчәк Сабирҗанова, Равия Җаппарова, Данис Гайфуллин башкаруында җырлар яңгырады. Рая Ахун кызы әниләргә ислам кагыйдәләре буенча булган фикерләрен җиткерде, Диляра Каратай яшь булып калу, сәламәтлек өчен файдалы киңәшләрен бирде. Ильвина Мавлиева уздырган мастер-класстан һәркем үзенә бүләк алып кайтып китте. Гөлчәчәк Сабирҗанова чыгышында чын Ана образын тулаем тудырды. Нәсимә Гарифуллина яшь булып калуның сере тормышны яратып яшәүдә булуын әйтте. Рания Галәветдинованың иҗат белән үзмәшһүл эшен бергә алып баруда тырышлыгы сокландырды. Кичәдә әйтелгән һәр сүз, һәр киңәш, әниләргә карата игътирам, хөрмәт уятуга, үз-үзеңне тәрбияләргә, үстерергә юнәлдерелгән иде. Уздырылган кичә бик җылы, файдалы булды. Чарада катнашучылар күңелләре ял итеп, рәхәтлек кичереп, рухи азык алып, олы рәхмәтләрен әйтеп таралыштылар.