Район мәдәният йортында Арча балалар сәнгать мәктәбенең халык уен кораллары оркестрының (җитәкчесе - ТР атказанган мәдәният хезмәткәре Фәхретдинова А.Л.) иҗат кичәсе узды. Концерт бөек татар шагыйре Габдулла Тукайның тууына 140 ел тулуга, Татарстанда Хәрби һәм хезмәт даны елына һәм Россия халыклары бердәмлеге елына багышланган иде. Чарада шулай ук «Күңелле балачак» вокаль ансамбле (җитәкчеләре - Ганиева А.И., Зиннәтуллина Р.Р.) ,«Мирас» гармунчылар һәм курайчылар ансамбле (җитәкчеләре - ТР атказанган мәдәният хезмәткәре Гайнуллин Б.М., ТР атказанган мәдәният хезмәткәре Харисов Р.Р.), аерым башкаручылар катнаштылар. Программага Г. Тукай шигырьләренә иҗат ителгән җырлар, рус, татар халык көйләре, керәшен татарларының җырлары керде. Шулай ук Бөек Ватан сугышы чорында төзелгән һәм совет солдатының батырлыгына багышланган әсәрләр яңгырады. Аларны сәнгать мәктәбе укучылары һәм укытучылары башкарды. Быел оркестр Альмира Леонидовна җитәкчелегендә иҗат эшчәнлегенең биш еллыгын билгеләп үтә. Коллективны матур юбилее белән Арча муниципаль районының социаль мәсьәләләр буенча башкарма комитеты җитәкчесе урынбасары Вафина Эльвира Шамил кызы һәм «Арча балалар сәнгать мәктәбе» директоры Сабирова Гөлнара Барый кызы котлады. Оркестрны чын күңелебездән котлыйбыз! Репетицияләрдә бетмәс-төкәнмәс энтузиазм, концертларда көчле алкышлар һәм яңа кызыклы репертуар телибез!

Бүген китапханәбездә 21 нче февраль – Халыкара туган тел көне уңаеннан “Туган тел мәңге яшәр!” дигән әдәби-музыкаль кичә узды. Кичәдә махсус чакырулы кунак буларак озак еллар Арча радиосында туган телебездә күп төрле тапшырулар алып баручы Гөлнара Фәннүр кызы Ситдикова, Г.Тукай исемендәге Арча педагогия көллиятенең 132 нче группа студентлары һәм укытучылары, Арча үзәк китапханәсе каршында эшләп килүче “Каурый каләм” әдәби-иҗат берләшмәсе әгьзалары, әдәбият-сәнгать яратучы китап укучы дусларыбыз катнашты. Кичәдә Туган тел көненең барлыкка килү тарихы турында мәгълүмат бирелде. Гөлнара Фәннүр кызының Арча радиосындагы эшчәнлеге, радио тапшырулар, эфирга чыгу ешлыгы, сәхифәләр турында әңгәмә оештырылды. Ул бу һөнәрне сайларга теләге булган яшьләргә үзенең киңәшләрен бирде, сөйләм телләренең байлыгы, камиллеге өстендә даими үсештә булырга кирәклеген әйтте. Шулай ук чарада туган телгә багышланган шигырьләр, җырлар яңгырады. ”Каурый каләм”леләр үз иҗат җимешләрен укыдылар. Килгән студентлар, алдан таратылган төрле темадагы текстларны тамашачы каршында укып, үзләренең дикторлык сәләтләрен сынап карадылар, Гөлнара Фәннүр кызы аларга үз бәясен бирде, телебезнең камиллеген саклауда уңышлар теләде. Әдәби-музыкаль кичә туган телебездә аралашып, фикерләр уртаклашып узды. Чара бергәләп Г.Тукай сүзләренә “Туган тел” җырын башкару белән тәмамланды. Әдәби-музыкаль кичәдә катнашучылар туган телебез, милли традицияләребез белән горурланып, аның киләчәге өметле кулларда булыр, “Туган тел мәңге яшәр!” дигән өмет белән таралыштылар.

Үзәк китапханәдә "Яшәү яме" клубына йөрүчеләр өчен файдалы, күп мәгълүмат бирә торган чара узды. Бу "Активное долголетие" проекты кысаларында оештырылды. Чарага китапханә хезмәткәрләре тәҗрибәле белгечләр чакырдылар. Очрашуга чакырылган табибә сәламәтлекне саклау серләре турында сөйләде, үзенең киңәшләрен бирде,истә тоту өчен киңәшләр язылган кәгазьләр таратты.Чарада катнашучылар белән әңгәмә, сорау – җавап эше оештырылды. Психолог олы яшьтә дә актив һәм шат күңелле булып калу серләре турында сөйләде, ә физкультура буенча белгечләр күнегүләр һәм дөрес сулыш алу гимнастикасы буенча мастер- класс уздырдылар. Чара кунакларына файдалы мәгълүматлар язылган буклетлар таратылды. Очрашу бик җылы атмосферада узды,катнашучыларга бай мәгьлүмат , яхшы кәеф бүләк итте.