Бүген китапханәдә «Беренчеләр хәрәкәте» оешмасында булган яшьләре өчен кызыклы һәм иҗади эш оештырылды. Очрашу китапханәдәге яңа китаплар белән танышудан башланды. Әсәрләр турында фикер алышканнан соң, балалар иҗади процесска керештеләр. Төсле кәгазь һәм картоннан матур китап кыстыргычлары ясадылар. Хәзер алар кирәкле битне югалтмаска ярдәм итеп кенә калмаслар, бәлки, узган әдәби чаралардан ишетеп-белгән укыласы китаплар исемлеген язып куеп, яңа ачышларга илһамландырып, укучыларның үзенә күрә көндәлеге булып китәрләр. Бу очрашу барлык катнашучыларда җылы хатирәләр калдырды. Укыганнары турында фикер алышу һәм үз куллары белән ниндидер яңа әйбер булдыру теләге балаларны бергә туплады.

Бүген Арча үзәк китапханәбездә “Туган авылым минем – Кәчем” дигән тарихи мәгълүматлар, борынгы нигезләр һәм нәсел шәҗәрәләре тупланган Фоат Дәүли улы Закировның “Кәче иле” китабын тәкъдим итү кичәсе узды. Тарихи кичәгә туган якның тарихы белән кызыксынган, авыл тарихларын барлап, китап итеп чыгарган авторлар, тарих укытучылары, Фоат Закировның нәсел җепләре тоташкан Балтач районыннан бер төркем туганнары, китапханәбезнең иң якын дуслары – китап укучылар катнашты. Чара башында кунакларга музыкаль сәлам тапшырылды. Китапханәче Фирдәвес Гарипованың “Авыллар һәм калалар тарихы” китабыннан Кәче авылы турында мәгълүмат белән таныштырды. “Кәче иле” китабы алты бүлектән тора. Һәр бүлеккә аерым тукталып, китап авторына сораулар бирелде, җаваплар алынды, китапханәчеләр тарафыннан китаптагы материаллар белән таныштырылды. Китапның 5 бүлеге “Нигезләр һәм шәҗәрәләр ни сөйли?”. Бу бүлеккә тукталганда, Балтач районыннан Гөлсем ханымның эчтәлекле, мәгънәле, нәселе белән горурланып сөйләгән чыгышы кичәгә аерым бер мәгънә өстәде. Аның котлавына бер төркем балтачлылар килеп кушылгач Закировлар нәселенең бердәм, ныклы, ышанычлы, хөрмәткә ия нәсел булуына тагын бер кат инандык. Гомумән, чара бик матур һәм файдалы узды. Киләчәккә авыл тарихлары язучылар өчен Фоат Дәүли улының “Кәче иле” китабы матур үрнәк булыр, китапханәбез киштәләре авыл китаплары тарихлары белән баер дип уйлыйбыз.

Бүген китапханәбездә Арча гуманитар-техник техникумы студентлары катнашында түгәрәк өстәл артында сөйләшү уздырылды. Очрашуның төп максаты: террорчылыкка һәм экстремизмга каршы көрәшне профилактикалау. Сөйләшү барышында төрле социаль янаулар алдында яшьләрнең психологик тотрыклылыгын арттыруга һәм тәнкыйди фикерләүне формалаштыруга аерым игътибар бирелде. Алга куйган максатларга ирешү өчен чарага «Мәрхәмәтлек үзәге» гаиләгә һәм балаларга социаль ярдәм күрсәтү бүлеге психологы Нуриева Резеда Фәнис кызы һәм социаль эшләр буенча белгеч Хисамова Роза Мансур кызы чакырылды. Алар эмоциональ интеллект һәм стресска каршы чыдамлылык үсешенә юнәлдерелгән файдалы психологик тренинглар үткәрделәр. Уздырылган чара ахырында китапханәче студентларны тематик китап күргәзмәсе белән таныштырды. Укучыларга файдалы мәгълүматлар тупланган китапларны укырга киңәш итте.

Бүген Арча агросәнәгать һөнәри көллияте студентлары өчен Бөтендөнья наркоманиягә һәм наркотикларның законсыз әйләнешенә каршы көрәш көненә багышланган түгәрәк өстәл артында сөйләшү узды. Студентларга сәламәтлекләрен саклау һәм начар гадәтләрдән баш тартуга карата дискуссия оештырылды. Чарада махсус кунаклар буларак «Мәрхәмәтлек үзәге» гаиләгә һәм балаларга социаль ярдәм күрсәтү бүлеге психологы Нуриева Резеда Фәнис кызы һәм социаль эшләр буенча белгеч Хисамова Роза Мансур кызы катнашты. Аларның сөйләгән чыгышлары, файдалы киңәшләре, уздырган тренинглары нәтиҗәсендә чара бик файдалы булды. Сөйләшү ахырында студентларның күзаллауларын киңәйтү максатыннан тематик китап күргәзмәсе белән таныштырылды.