ФОТОРЕПОРТАЖЛАР

Ташкичү авыл китапханәсендә халыкара урман көненә багышланган "Әйдәгез сәяхәткә!” исеме астында экологик уен узды. Экологик уен “Табигатьне ничек сакларга?” Һәм “Нәрсә ул Кызыл китап?” дигән диалогтан башланды. Чара барышында балалар 2 командага бүленделәр “Знатоки” һәм “Умники”. Командаларга “Елның дүрт вакыты”, “Бу яфрак нинди агачтан?”, “Үсемлекләр дөньясы, хайваннар дөньясы” исемле уеннар тәкъдим ителә. Шулай ук балалар кроссворд чишеп, үз белемнәрен тикшерделәр. Кроссвордны фаразлауда ярдәмгә “Табигать тиңсез хәзинә-аның кадерен бел генә” дип аталган китап күргәзмәсе килә. Экологик уен барышында балалар табигатьтә файдасыз үсемлекләр һәм агачлар булмаячагын һәм алар бөтен үсемлек һәм хайваннар дөньясына сак карарга тиешлеген аңладылар.

Арча район балалар китапханәсендә 2 нче номерлы мәктәпнең 4нче сыйныф укучылары өчен «Хайваннар дөньясында» дип исемләнгән кызыклы чара узды. Балалар кешеләрнең әйләнә-тирә мохит белән бәйләнешен ачыкладылар, төрле уеннарда катнаштылар, актив аралаштылар, сорауларга җавап бирделәр. Шулай ук алар Кызыл китап белән таныштылар һәм китапның төрле төстәге битләрдән торганын, һәр битенең үз әһәмияте барлыгын белделәр.

Балалар өчен "Могҗизалы су" дигән Бөтен дөнья су ресурслары көненә багышланган эрудитлар рингы Кзыл-Яр авыл китапханәсендә узды. Викторина алдыннан балалар белән суга багышланган шигырьләр һәм табышмакларны искән алдык. Су нәрсәгә кирәк; дөньда нинди елгалар бар; авылыбыз янында нинди елгалар, чишмәләр бар, дигән сорауларга җавап бирде нәни укучыларыбыз. Викторинаның сораулары проектор ярдәмендә экранга чыгарылды. Балалар 3 варианттан дөрес җавап әйтергә тиеш иде. Һәрбер дөрес җавап өчен уйнаучылар 1 балл, ягъни бер стакан суга ия булдылар. Уен азагында кемнең банкасында су күбрәк булды, шул җиңде. Балалар кызыксынып уйнадылар, үзләрен зирәк һәм тапкыр икәннәрен күрсәттеләр.

Кышкар авыл китапханәсендә «Без – табигать балалары» экологик калейдскоп дигән чара узды. Мәктәпкәчә яшьтәге балалар Җир планетасы буйлап мавыктыргыч сәяхәткә чыктылар. Балаларны кызыклы конкурслар, күпсанлы сынаулар, төрле биремнәр көтә иде. Иң беренче «Кошлар аланы»нда булдылар. Балалар табышмакларга җаваплар таптылар һәм әкият кошларын таныдылар. Шулай ук кошларның файдасы, аларның табигатьтәге һәм кеше тормышындагы рольләре турында да белделәр. Сәяхәтне «Урман аланы»нда дәвам иттеләр. Юлда бик күп гөмбәләр очрады. Гөмбә аланында ял итеп алдылар. Урман хәйваннары турында табышмакларның җавапларын таптылар. “Урман җиләген җый” уенын уйнадылар. Балалар табышмакларга җаваплар таптылар, геройлары чәчәкләр булган әкиятләрне искә төшерделәр. "Күбәләкне чәчәккә утырт" уенын бик яратып уйнадылар. Соңгы тукталыш "Каенкай" аланы. Балалар аланны чүп-чардан арындырдылар, җимешләрнең һәм яфракларның кайсы агачтан икәнен белделәр. Ә "Төз ат" уенында балалар кәгазьләрне чүп чиләгенә ыргыту күнекмәсен ныгыттылар. Барлык аланнарны да үтеп, балалар, табигатьтә үз-үзеңне тоту кагыйдәләре белән таныштылар.

Арча район балалар китапханәсендә Арчаның 1нче урта мәктәбенең 2 нче сыйныф укучылары Халыкара урман көненә багышланган «Урман-табигый байлык» дигән бик файдалы һәм кирәкле экологик чарада кунакта булдылар. Чөнки урманнар бәяләп бетергесез экологик, социаль һәм икътисади әһәмияткә ия.Чараның төп өлешендә балалар викторинада катнаштылар, үзләренең табигать өлкәсендә булган белемнәрен күрсәттеләр һәм истәлекле бүләкләр белән бүләкләнделәр. «Урман-безнең йорт» дип исемләнгән мультфильм карап үттеләр. Аларны табигатькә сакчыл мөнәсәбәттә булыр дип өметләнәсе килә.

Лесхоз авыл китапханәсендә “Эколята” экология клубы әгъзалары һәм 2-3 сыйныф укучылары өчен “Канатлы дусларыбыз” дигән әдәби экология сәгать үткәрдек. Алар китапханәченең канатлы дусларыбыз турындагы хәбәрен тыңладылар, презентация карадылар, безнең төбәктә яшәгән кошларның тавышларын тыңладылар. Балалар “Иң, иң яхшылар” викторинасында актив катнаштылар, “Кошлар ничек җырлый”, “Оча - очмый”, “Кош һөнәре” дигән уеннар уйнадылар. Аннары балаларны «Птичий гомон» мастер-классына чакырдык. Төрле материаллардан бик теләп кошлар ясау серләре белән таныштылар. Ә тагын балалар яз көне кошларга комачауламас, бистә һәм урманда һәрвакыт канатлы дусларыбыз, бәләкәчләр яшәсен өчен табигатьтә үзеңне ничек тотарга икәнен белделәр.

Яз җитү белән авылларда язгы санитар чистарту эшләре башлана. Чөнки яз җитү белән кыш буе кар астында яткан чүп-чар чыга башлый. Хәсәншәех авыл Мәдәният йорты хезмәткәрләре язгы чистарту эшләрендә актив катнашты. Мәдәният йорты территориясеннән,билгеләнгән участоклардан, юл кырыйларыннан кар астыннан чыккан чүп-чарны җыйдылар. Яшәгән җиребезне чиста тоту- һәркемнең изге бурычы.