ФОТОРЕПОРТАЖЛАР

Наласа авыл китапханәсендә 6 сыйныф укучылары өчен «Табигатьне саклау - туган илеңне саклау ул» дип аталган экологик сәгать узды. Чара вакытында укучылар табигать күренешләре булган язгы ташу, гөрләвек, чоңгылның ничек итеп барлыкка килүе, аларның табигатькә, кешелеккә булган файдасы һәм зыяны турында сөйләштеләр. Китапханәче Гөлчәчәк Рөстәмовна укучылар белән «Безнең төбәк кошлары» дип аталган экологик викторина үткәрде. Әлеге чарага «Табигать – тиңсез хәзинә» дип аталган китап күргәзмәсе дә оештырылды. Күргәзмәдә йорт һәм кыргый хайваннар, кошлар, балыклар, үсемлекләр, урман турындагы ачык төсле китаплар, энциклопедияләр урын алды. Ленар Шәехнең «Табигать күренешләре энциклопедиясе» укучыларда аеруча зур кызыксыну уятты. Чарада Г. Тукай, Ә. Исхак, Н. Арсланов, Р. Миңнуллин, Л. Шәех, Й. Шарапова, Ш. Галиев кебек татар әдипләренең туган як табигате турындагы шигырьләре укылды.

Ел саен 1 нче апрельдә Халыкара кошлар көне билгеләп үтелә. Әлеге акциягә кушылып, Мөндеш күпфункцияле үзәгендә 1-4 сыйныф укучылары өчен «Сайрар кошлар яратып каршылыйк» дип исемләнгән экологик сәяхәт узды. Очрашуда балалар әлеге көннең тарихы, кошларның файдасы, аларның табигатьтә һәм кеше тормышындагы роле турында белделәр. Уен – викторинада катнаштылар. Укучыларга «Кошлар-безнең дуслар» дип исемләнгән китап күргәзмәсе төзелде, төп геройлар- безнең канатлы дусларыбыз турында китаплар тәкъдим ителде.

Шушмабаш авыл җирлеге Казан шәһәрендә узган авыл хуҗалыгы ярминкәсендә катнашты.

Иске Кырлай авыл мәдәният йортында китапханә белән берлектә Халыкара кошлар көненә багышланган «Кошкайлар, дускайлар» дип аталган экологик сәгать уздырылды. Презентация ярдәмендә балаларны канатлы дусларыбызның тормышы белән таныштырдылар, аларның табигать һәм кеше тормышындагы әһәмияте турында сөйләделәр. Балаларны Арча районының Кызыл китабы белән дә таныштырдылар. Аларга мавыктыргыч мастер-класс тәкъдим ителде. Идея бик гади, ләкин балаларга бик ошады. Эшләнмә бик оригиналь килеп чыкты. Чарага китап күргәзмәсе дә әзерләдек. Балалар канатлы дусларыбыз турында тәкъдим ителгән әдәбият белән кызыксынып таныштылар.

Симетбаш авыл клубында балалар өчен "Кошлар безнең дусларыбыз " дип исемләнгән чара уздырылды. Күчмә һәм үзебездә кышлаучы кошлар турында мәгълүмат бирелде, аларны танырга өйрәндек, шулай ук башка кызыклы информация тупланды.