Ветераннар рәхмәте

Ветераннар рәхмәте
12 апрельдә бер төркем хезмәт ветераннары Чувашия республикасы, Батыр районы, Шыгырдан авылына юл тотты. Көн кояшлы булмаса да, юл такыр, чиста, автобус тиз барды. Юлда 4 сәгать бару сизелмәде дә.
Шыгырданда иң элек мәдәният йорты бинасы каршына килеп туктадык. Мәдәният йортында эшләүче кызлар чәй өстәле әзерләгәннәр иде. Өстәл артында бер–беребезгә сораулар биреп, матур җаваплар алып канәгать калдык. Авыл җирлеге башлыгы Рәшит әфәнде үз авылы турында тәфсилләп сөйләде. Авыл бик зур, халкы 6 меңнән артык. 7 мәхәлләдә 7 мәчет, 3 мәктәп, юллар асфальт, ишегалды саен 2–3 автомашина, трактор, кран бар. Ә абзарларда берничә баш сыер, симертү үгезләре, сарыклар, тавык–чебеш. Йортларның матурлыгына исең китәрлек.
Мәдәният йортыннан чыккач, авыл буйлап сәяхәтебезне башлап, мәчетләргә юл тоттык. Биредә мәчетләр буш тормый, олылар да, яшьләр дә намазга йөри. Бер мәчеттә эшлекле әңгәмәдән соң мәктәпкә юл алдык. Мәктәп заман таләпләренә туры килә: җылы, якты, чиста. Якташларга багышланган стенд-лар бар, алар турында горурланып сөйлиләр. Кабинет системасы, интерактив такталар, компьютерлар бар.
Мәктәптән соң авыл урамнары буйлап экскурсиягә киттек, берничә кешенең хуҗалыгында булдык. Менә кайда ул җәннәт, тырыш хезмәтнең нәтиҗәсе! Авыл халкының якты чырае, кунакчыллыгы күңелләребезгә хуш килде. Биредә һәркем эш белән мәшгуль, буш вакытлары юк.
Экскурсия тәмамлангач, без яңадан мәдәният йортына җыелдык. Анда безне тагын шул табын көтеп тора иде. Ветераннарыбыз, гармунда уйнап, җырлап күңел ачтылар. Хуҗаларга чын күңелдән рәхмәт әйттеләр, эшләрендә тагын да зуррак уңышларга ирешүләрен, тазалык–тынычлык теләп, саубуллашып кайтыр юлга чыктык.
Үзебезнең милләттәшләребезнең тормышына сокланып, ихтирамыбыз артып, горурланып кайттык. Шундый күңелле сәяхәт оештырганнары өчен район башлыгы Алмас Әмин улы Назировка олы рәхмәтебезне җиткерәбез. Шулай ук ветераннар советы рәисе Альберт Җамалиевка бик зур рәхмәт. Автобус шоферы безне ипле генә йөртте. Юлларда исән–сау йөрсен, ветераннарның аңа да олы рәхмәте ирешсен.
Барлык ветераннар исеменнән
Сәвия Җамалиева