Яңалыклар

«Казан арты» тарих-этнография музее РФ күләмендә «Тарих елы», Татарстанда «Тарихи-мәдәни мирас елы» кысаларында май ае дәвамында «Чорма операциясе» дип исемләнгән акция игълан итә. Чараның максаты — тарихи һәм мәдәни әһәмияткә ия булган ядкәрләрне барлау, туплау һәм музей фондларын тулыландыру. Әгәр дә сездә иске көнкүреш җиһазлары, авыл хуҗалыгы кораллары, һөнәрчелек җәүһәрләре, киемнәр, бизәнү әйберләре, гарәп язуында каурый каләм белән язылган кулъязмалар, басма китаплар, дәфтәрләр, хатлар, фотосурәтләр, документлар бар икән, телефон яки хат аша хәбәр итүегез сорала. Адрес: Арча шәһәре, Сызгановлар (Октябрь) ур., 22 йорт, тел.: 3-06-79.

27 апрельдә «Казан арты» тарих-этнография музеенда «Чернобыль атом электростанциясендәге зур һәлакәткә 26 ел» исеме астында кичә булып үтте. Чернобыльче якташларыбыз Илдар Бикбаев, Фәнәвил Җәләев шул көн хатирәләрен укучылар белән уртаклаштылар. Бу вакыйганы тагын да якынрак күзаллау өчен ТНВ-Арча каналы төшергән фильмнан өзек тә күрсәтелде. Шулай ук Чернобыльче якташларыбызның истәлекле шәхси кәгазьләре, газета-журналлары, рәхмәт хатларыннан төзелгән күргәзмә дә килгән кунакларда зур кызыксыну уятты.

“Мәктәптә “Исәнмесез, кошкайлар, безнең якын дускайлар” дип исемләнгән кичә үтте. Биология укытучысы Рузилә Һадиева әзерләгән 5–8 сыйныфлар катнашындагы бу кичә төрле уеннар, җырлар белән үрелеп барды.
Мәктәптә “Табигать — тиңсез хәзинә” дип исемләнгән экологик почмак, укучылар иҗат иткән рәсемнәр, кошларга ясалган берсеннән–берсе матур оялар, җимлекләр үз урынын алган.
Кичәдә табигатьне саклау, экологик тәрбия төрле уеннар аша чагылдырылды. Табигатькә сакчыл караш — чисталык, сәламәтлек нигезе. Аны үтәү һәр кешенең максаты һәм бурычы булса иде”, — дип яза Шушмабаш мәктәбе укытучысы Асия Җаббарова.