Мәңгелек иҗат дәрьясы

Мәңгелек иҗат дәрьясы
Габдулла Тукай тормышыбызда елдан–ел зуррак урын ала. Аның иҗатына багышланган чаралар матур традициягә әверелә. Бөек шагыйрьнең 126 еллыгын да Тукай якташлары, милли рухлы шәхесләребез югары дәрәҗәдә билгеләп үтте. Мәктәпләрдә, мәдәният учреждениеләрендә берсеннән–берсе күңелле, кызыклы һәм матур чаралар үткәрелде.
22 апрель көнне Арча Укучылар сараена 29 районнан 200гә якын иң актив бала җыелды. Биредә “Туган як серләре” дигән республика экспедициясе үткәрелде. Бөек шагыйрь туган көне уңаеннан әлеге “Тукай эзләреннән җәяүле сәяхәт” быел 18нче тапкыр уздырылды. Кунаклар Арчадагы әдәбият һәм сәнгать, “Казан арты” тарих–этнография музейларында булдылар, шәһәр белән таныштылар, аннан Яңа Кырлайга юл тоттылар. Анда Нәүрүз бәйрәмендә катнаштылар, Габдулла Тукай музеенда булдылар, кичен кунаклар үзләре дә Яңа Кырлай мәктәбе укучылары белән берлектә “Иң яхшы вожатый” дигән республикакүләм бәйге оештырдылар. Икенче көнне экспедициядә катнашучылар Кушлавычка юл алган. Анда балалар Тукай музеенда булганнар, зиратка барып шагыйрьнең әтисе каберенә чәчәкләр куйганнар, мәчетне караганнар. Шунда экспедициягә йомгак ясалган.
Арча үзәк китапханәсе каршындагы “Яшәү яме” ветераннар клубы (җитәкчесе өлкән китапханәче Әлфия Галимова) әгъзалары шигъри кичә үткәрде. Башта шагыйрь иҗатына кыскача күзәтү ясалды, аннан “Тукай” дигән нәфис фильм карадылар, Минһаҗ Кашапов, Факия Шәрәфетдинова, Роза Шәйхетдинова, Майфәрваз Миннебаева, Ләйсән Зарипова, Гайшә Якупова үзләре иҗат иткән, Гөлфия Исламова, Флера Гатауллина, Гайшә Якупова шагыйрь иҗатыннан шигырьләр укыдылар, Фатыйма Шаһиева җырлады, Халидә Фәйзрахманова бәйрәм белән котлап чыгыш ясады. Соңыннан Гаяз Сафин, курайда уйнап, “Туган тел”не җырлатты. Кичә ахырында Әлфия Галимова ветераннарга китаплар бүләк итте.
Яңа Кенәр китапханәсе дә бу көннәрдә гөрләп торган. Биредә Яңа Кенәр лицееның өченче сыйныф укучылары белән “Тукай – мәңге сүнмәс йолдыз” дигән әдәби–музыкаль, унынчы сыйныф укучылары белән “Тукай белән янәшә” дип исемләнгән портрет–кичә үткәрелгән. Балалар татар халкының мәңге яшь шагыйре Г.Тукай тормышы, иҗатына багышланган викторинада актив катнашканнар, аның шигырьләрен укыганнар. Соңыннан Яңа Кенәр мәдәният йорты каршындагы Тукай паркындагы әкият геройлары сыннары янында фоторәсемгә төшкәннәр.
Өчиледә Габдулла Тукайның туган көнен быел да зурлап билгеләп үткәннәр. Өчиле мәктәбендә әлеге истәлекле көн уңаеннан атналык уздырылган. Шигырь укучылар, рәсем ясаучылар, инша язучылар аерым–аерым көч сынашкан. Илгиз Зыятов Тукай шигырен иң оста укучы, Сөмбел Вәлиева иң матур инша авторы дип табылган, ә яшь рәссамнар арасында беренче урынны Дилә Зыятова, Ландыш Мөхәммәтҗанова алган. Ландыш Тукайга багышлап үзе язган шигыре белән дә куандырган. Китапханәче Гөлнара Вәлиева “Син Тукайны беләсеңме?” дигән викторина, Айрат Зыятов “И мөкатдәс моңлы сазым” дигән әдәби–музыкаль кичә үткәргән, Ләйсән Шакирова 5нче сыйныф укучылары яр-дәме белән Тукай әкияте геройларын сәхнәгә чыгарган. Ветеран укытучы Фәрхат Зыятов та мәктәпкә кунакка килгән, Тукай шигырьләрен укыган.
Арча яшьләр эшләре, спорт һәм туризм бүлеге “Арча — Кырлай” маршруты буенча җиңел атлетика эстафетасы үткәргән. Анда “Олимп” балалар һәм яшүсмерләр спорт мәктәбе һәм педагогика көллиятеннән дүрт команда катнашкан. Көллиятнең беренче командасы беренче урынны алган.
Яңа Кырлай мәдәният йортында шагыйрь туган көн уңаеннан “Кырлайда кунакта” (рәсемдә) дигән әкияти роман буенча эшләнгән театральләштерелгән тамаша куелган. Авторы — Арча кызы Гөлүсә Яһудина.
— Мин Арчаның өченче мәктәбендә укыдым. Кечкенәдән шигырьләр, чәчмә әсәрләр яздым. Бу юнәлештә китмәсәм дә, шөгылемне ташламадым. “Күңелемдә татар рухы” исемле шигырьләр китабым, “Шәһри Болгар. ru” исемле тарихи романым дөнья күрде. Өченче китабымны Тукайга багышладым, — ди Гөлүсә.
Ул, анда Тукайның барлык әкият геройларын бергә җыеп, тәрбияви мәгънәгә ия әсәр тудырган. Монда татар халкының гореф–гадәтләрен саклау, мохтаҗларга ярдәм итү, күңел чисталыгы кебек мәсьәләләр күтәрелгән.
— Театральләштерелгән тамашада Арча мәктәпләре укучылары, педагогика көллияте студентлары катнашты. Оештыру эшләрендә булышкан өчен Арча мәдәният идарәсе, Г.Тукай мемориаль музее җитәкчеләренә, режиссер Рафис Сәләхетдиновка рәхмәтем зур, — ди автор.
Хәзерге вакытта Гөлүсә Яһудина махсус “Җидегән чишмә” Арча халык театры өчен “Ирләр дә елый” дигән драма язу өстендә эшли.
Тукай, туган телне төп тема итеп алып, шигырьләр иҗат итүче каләм осталарыбыз да бар. Арчаның 5нче гимназиясеннән Зөһрә Камалова “Тукай теле”, “Тукайга” дигән шигырьләрен редакциягә юллаган.
“Гасыр елгасы акса да,
Тукай безнең хәтердә.
Мең яшәрсең, Бөек Кеше
Халкыңның күңелендә”, — дип яза Зөһрә.
Урта Бирәзәдән Дамир Нуриәхмәтовның “Яшә, хәтер” дигән шигыре дә шагыйрь рухы белән сугарылган.
“Еллар үткән саен, шөкер, киресенчә,
Яратыбрак укый кебек сине халкыбыз.
Тукай дигән бөек исемең онытырга
Бер мыскал да юктыр хакыбыз”, — ди ул.
Шундый милли җанлы шәхесләребез булганда Тукай рухы яшәр, буыннан–буынга күчәр. Тукай рухы ул — мәңгелек иҗат дәрьясы.
Гөлсинә ЗӘКИЕВА