Дым барында чәчеп кал

Дым барында чәчеп кал (фото)
Быел язгы кыр эшләрендә югары күрсәткечләр өчен “Бердәм Россия” партиясе җирле бүлекчәсе политсовет секретаре Алмас Назировның Рәхмәт хаты, акчалата премия һәм вымпелга иң беренче булып “Ак Барс–агро” һәм “Курса МТСы” ширкәтләре механизаторлары Яхъя Габидуллин белән Алмаз Әхмәдуллин лаек булды.
Әлеге бүләкләрне бүлекчәнең башкарма комитеты җитәкчесе Тәлгать Җәләлетдинов тапшырды.
Яхъя Габидуллин районда танылган механизатор. Үзе чәчә, уңышын да үзе җыеп ала. Язын алдынгы тракторчы, көзен иң яхшы комбайн-чылар исемлегендә булыр.
— Быел да сынатырга исәп юк, — ди ул. — Иртүк чыгып, кичке тугызга кадәр эшлибез.
Ширкәтнең баш агрономы Рөстәм Мөхәммәдиев әйтүенчә, эшләр көйле бара, тоткарлыклар юк. Механизаторлар тәҗрибәле, техника да сынатырлык түгел. 1592 гектардагы уҗымнар тукландырылган, тырмаланган, зәп һәм пар җирләрен тырмалау төгәлләнеп килә. Бер мең гектарга якын чәчү чәчелгән.
— Терлек азыгы культураларына, яшел конвейер булдыруга аеруча игътибар бирәбез, — ди баш белгеч. — Хәзерге вакытта 4 агрегат чәчә, орлыкларны биологик, микро, химик препаратлар белән эшкәрттек.
“Курса МТСы” басуларында да кызу эш кайный, кайсы якка карасаң да агрегатлар мәш килә, кайсы тырмалый, кайсы культивация ясый, чәчә. Ашлама, орлык чыгаручы машиналар да шунда.
Бригадир Рамил Миң-һаҗевның эш өчен борчылып йөреп тамагы карлыккан, салкын җиле дә үзәкләргә үтәрлек бит. Әмма кәефе күтәренке бригадирның: “Менә туфрак ничек әйбәт килгән — гөл балчыгы кебек”, — дип шатлана, тырыш механизаторларны мактый. Алмаз Әхмәдуллин әнә шул мамыктай туфракка арпа чәчә, бүләкләрне рәхмәт әйтеп алды да, кузгалып китте.
Курсалылар, елдагыча, алдан элдерә. Инде чәчүнең дә яртысын чәчеп куйдылар.
Район хуҗалыкларында 25100 гектардагы уҗымнарның 22656 гектары тукландырылды һәм тырмаланды. 47565 гектарда (план 74330 гектар) зәп һәм пар җирләре тырмаланды. 5917 гектарда (план 66511 гектар) сабан культуралары чәчелде. Бөртекле һәм бөртекле–кузаклы культуралар 37853 гектарда чәчелергә тиеш булып, шуның 4532 гектары чәчелде.
“Курса МТСы”, “Ак Барс–агро”, “Игенче” хуҗалыкларында дым каплатуга аеруча игътибар бирелә. “Акчишмә”, “Аю” хуҗалыклары гына чәчүгә керешмәгән.
“Ватан”, “Кырлай”, “Игенче” хуҗалыкларында чәчү агрегатлары төнлә дә эшли.
2 майда ТР Министрлар Кабинетында үткән брифингта авыл хуҗалыгы һәм азык–төлек министры урынбасары Илдус Габдрахманов 9 майга иртә сабан культураларын чәчү төгәлләнәчәген белдерде. Май уртасына басулардагы башка эшләрне дә тәмамларга кирәк.
Министр урынбасары метеорологларның май ахырында, июль һәм сентябрьдә коры һава фаразлавын әйтте. 2010 елдагы кебек корылык көтелми. Хәзерге вакытта туфракта кирәк кадәр дым бар, вакытында чәчелгән орлыклар әйбәт шытым бирәчәк.
Ильяс СӘХӘПОВ