“Ватан”да сәбәп эзләмиләр

“Ватан”да сәбәп эзләмиләр
“Ватан” хуҗалыгында уҗымнар өшеми дә, череми дә, авыруларга да бирешми. Быел да яшел хәтфәдәй булып утырган басуларына карап сокланырлык. Көзен бөтен шартларын китереп, әйбәт срокта чәчкәнгә шулай ул. Җитәкче, белгеч, механизаторлар шулай таләп итәргә һәм эшләргә күнеккән.
Хуҗалыкның икътисадчысы Рәис Закиров безне Марат Сафин эшләгән басуга алып барды. Соңгы вакытта бу якларда көчле яңгырлар явып үткән, алдагы көнне эшли дә алмаганнар. Аңа карап артта калмый алар, чөнки мөмкин булганда тәүлек буе чәчтеләр, иртә культуралар чәчүне беренчеләрдән булып төгәл-ләделәр. Инде сабан басулары да яшәреп килә.
— Менә монысы узган ел чәчелгән люцерна, — ди икътисадчы. — Шул кадәр килеште аңа, әнә бөтен җирдә тигез күтәрелеп килә.
Быел да күпьеллык үләннәрне 400 гектарда чәчкәннәр. Хуҗалыкта аларны дүрт елдан артык тотмыйлар.
Хуҗалыкның алдынгы механизаторы Марат Сафинга бу көнне “Бердәм Россия” партиясенең җирле бүлекчәсе башкарма комитеты җитәкчесе Тәлгать Җәләлетдинов бүлекчәнең политсовет секретаре Алмас Назировның Рәхмәт хатын һәм акчалата бүләк тапшырды.
Шундый ук бүләкне “Северный” хуҗалыгы механизаторы Рәдис Низамов та алды.
Район хуҗалыкларында сабан культуралары чәчү төгәлләнеп килә.
— Районның төньяк зонасында яуган көчле яңгырлардан соң басуларда кабык барлыкка килде, — ди район авыл хуҗалыгы һәм азык–төлек идарәсенең үсемлекчелек бүлеге җитәкчесе Миннәхмәт Сәгыйтьҗанов. — Аны бетерү өчен мөмкин булган ысулларны кулланырга кирәк. “Ватан” хуҗалыгында барлык чәчүлекләрне тишелеп чыкканчы тырмалыйлар, шуңа күрә аларның басулары да чиста була.
Чәчүлекләрне тәрбияләр вакыт җитте. “Кырлай” ширкәтендә сабан чәчелгән басуларда өстәмә тукландыру үткәрәләр. Арыш көпшәләнү фазасына керде, иртәрәк чәчелгән сабан басуларында чүп үлән-нәргә каршы көрәш чаралары уздырырга була.
Терлек азыгы әзерләү техникасын әзерлек сызыгына кую көн кадагына килеп басты. 21–24 май көннәрендә аларны кабул итү уздырыла.
Ильяс СӘХӘПОВ