“Җидегән чишмә” яңадан Казанда

“Җидегән чишмә” яңадан Казанда
11 майда Бөтенсоюз һәм республика смотрлары лауреаты “Җидегән чишмә” Арча халык театры яңадан Казан тамашачысы каршында чыгыш ясады.
Узган ел коллектив, Кәрим Тинчурин исемендәге татар дәүләт драма һәм комедия театрында Хәбир Ибраһимов һәм Рәдиф Сәгъдинең “Кияү абый” водевилен күрсәтеп, Казан тамашачысы мәхәб-бәтен яулаган иде инде.
Быел “Җидегән чишмә”леләр яңадан шушы сәхнәгә күтәрелде. Спектакль карарга килүчеләрне, һәрвакыттагыча, арчалылар якты чырай, чәк–чәк, җыр–бию белән каршы алды. Тамаша башланыр алдыннан да сәхнәгә милли костюмнардан гармунчыларыбыз чыкты, тирә–якка татар моңын яңгыратты, аннан Дамир Гасыймов җыр сузды. Музыкаль сәламләүдән соң район башкарма комитеты җитәкчесе урынбасары Надия Мифтахетдинова театр тарихы, коллектив белән таныштырды.
Бу юлы “Җидегән чишмә” халык театры коллективы Казан тамашачысы игътибарына Туфан Миңнуллинның “Саташу” спектаклен (режиссеры Рафис Сәләхетдинов) тәкъдим итте. Үзе исән чагында Туфан ага Арчага “Саташу”ның премьерасына кайткан, аннан икенче тапкыр хатыны һәм кызын алып килгән, артистлар чыгышына югары бәя биргән иде. Тик язмыш кайчак шундый мәрхәмәтсез: янып эшләп йөргәндә явыз үлем аны арабыздан алып китте. Театр коллективы бу чыгышын Туфан Миңнуллинның якты истәлегенә багышлады. Залда мәрхүмнең хатыны, Татарстан Республикасы һәм Россия Федерациясенең халык артисткасы, Тукай исемендәге премия иясе Нәҗибә Ихсанова да бар иде. Соңыннан телефоннан шалтыратып ул үзешчән артистларга рәхмәтен һәм ихтирамын белдерде, үзе дә киләчәктә киңәшләре белән ярдәм итәргә әзер булуын әйтте.
Казан тамашачысы эчтәлекле, гыйбрәтле “Саташу” спектаклен яратып карады. Соңыннан үзешчән артистларны чәчәкләргә күмде, аягүрә басып алкышлап, бик озак сәхнәдән җибәрмәде.
— Тамашачының аңлап, игътибар белән каравыннан чыгып шуны әйтә алам, нәкъ менә “Саташу” кебек тирән эчтәлекле, мәгънәле әсәрләр кирәк халыкка. Һәм үзешчән артистлар да әсәрдәге теманы тулысынча ачып бирә, тамашачы күңеленә җиткерә алдылар, — диде спектакльдән соң Татарстан һәм Россиянең халык артисты, Г.Тукай исемендәге Дәүләт бүләге иясе, Г.Камал исемендәге Татар дәүләт академия театры артисты Әзһәр Шакиров.
Аннан Туфан Миңнуллинны искә алып, бер минутлык тынлык игълан итте. Арчалылар чыгышын карарга Татарстан Республикасы Президенты каршындагы Мәдәниятне үстерүне яклау фонды җитәкчесе Нурия Хашимова, Татарстан Республикасы Мәдәният министрлыгының сәнгатьне үстерү һәм автор хокукларын саклау бүлеге җитәкчесе Зөлфирә Салехова, фән-ни–методик үзәкнең халык иҗаты бүлеге мөдире, Татарстанның атказанган мәдәният хезмәткәре Камил Саттаров, Татарстанның һәм Башкортстанның халык артисты Гөлсем Исәнгулова, драматург, Татарстан Язучылар берлеге әгъзасы Хәбир Ибраһимов һәм башкалар килгән иде.