Борһанов урамында бәйрәм

Борһанов урамында бәйрәм
Бөек Ватан сугышында Җиңүгә 67 ел тулу уңаеннан “Бердәм Россия” сәяси партиясенең җирле бүлекчәсе яшь гвардиячеләре Борһанов урамындагы паркта “Мәңгелек хәтер бар” дип исемләнгән кичә үткәрделәр. Анда сугыш һәм тыл ветераннары да чакырылган иде.
Җиңүгә 67 ел вакыт узса да, ул чор авырлыкларын йөрәкләре аша үткәргән өлкәннәр өчен бүгенгедәй күз алдында. Илебезне җимерде, күпме кеше тормышын алып китте, хатыннарны тол, балаларны ятим итте ул сугыш. Бүгенге яшь буын алар яулап алган тыныч тормышта яши. Алар өчен сугыш — тарих, хәтер. Сугыш кырында аяусыз көрәшкән, тылда үзләрен аямыйча эшләгән әби–бабалар бүгенге яшьләр өчен дә, киләчәк буын өчен дә мәңгелек үрнәк.
— Сугыш безнең район өчен дә бик кыйммәткә төште. Һәр гаиләгә кайгы–хәсрәт китерде. Фронтка киткән 25 мең арчалының 14 меңе кире әйләнеп кайтмады. Якташларыбыз арасында биш Советлар Союзы Геройлары да бар. Без, “Бердәм Россия” яшь гвардиячеләре, тынычлыгыбыз өчен башларын салган якташларыбыз алдында баш иябез, Тынычлык байрагын, Җиңү Байрагын югары тотарга вәгъдә итәбез, — диделәр әдәби композициядә катнашкан Арчаның беренче мәктәбе укучылары.
Бәйрәмдә ТР хәрби комиссариатының Арча һәм Әтнә районнары буенча бүлек җи-тәкчесе Алмаз Борһанов та катнашты. Ул ветераннарны Җиңү бәйрәме белән котлады.
— Сез яшь буынны сабыр булырга, икмәк кадерен белергә өйрәттегез, чын дусның нинди булуын күрсәттегез, туган илне үзеңне аямыйча сакларга кирәклекне аңлаттыгыз. Без сез бүләк иткән тыныч тормышта яшибез. Шул тынычлык сагында безнең Арча ягы егетләре дә тора, намус белән хезмәт итә. Быел яз тагын 104 егет армия сафларына алына. Алар сезнең үрнәктә тәрбия-ләнгән егетләр. Шуңа безнең илебез ышанычлы кулларда, дип курыкмыйча әйтә алам, — диде Алмаз Әгъзәмович һәм 13 майда армиягә китүче 5 егеткә тантаналы төстә чакыру кәгазе тапшырды (рәсемдә).
Бәйрәм бүләкләргә дә бай булды, истәлекләр белән дә уртаклашылды, хәтер “дөньясыннан” да әйләнеп кайтылды. Арча шәһәренең мактаулы гражданины Илдус Сәгъдиев, сугыш һәм хезмәт ветераны Хак Шәфигуллин Тимерхан Борһановның сугыш һәм хезмәт елларындагы батырлыкларын искә төшерделәр, район башкарма комитеты җитәкчесе урынбасары Надия Мифтахетдинова “Үз шәмеңне кабыз” акциясе кысаларында узган “Җиңү көне балалар күзлегеннән” дигән фоторәсемнәр бәйгесенә нәтиҗә ясады. Борһанов урамында яшәүчеләргә ихтирам аеруча зур булды. Озын гомерле Гадения Фәтхрахманова, 50 елдан артык бергә гомер иткән Факия һәм Ислам Зәкиевлар, Нурдидә һәм Мәснәви Фәйзрахмановлар, Дания һәм Нәбиулла Хәкимҗановлар, Фәүзия һәм Мәхмүт Сафиннар да бәйрәмнең кадерле кунаклары иде. Алтын юбилярларны Надия Мифтахетдинова һәм Асия Борһанова котлады, ә Расих Галим-җанов аларга яраткан җырын бүләк итте. Тормыш юлын 50 ел буе иңне–иңгә куеп үткән өлкәннәрне яңа өйләнешкән Екатерина һәм Александр Петряковлар, әти–әниләре белән килгән урамның иң яшь кешеләре Артур Гарифуллин, Даниял Надыршин, Ясминә Миннемуллина алыштырды. Урамның иң актив ханымы Нәгыймә Заһриева, Татарстан Республикасының атказанган икътисадчысы исеменә лаек булган Илзирә Насыйбуллина, “Иң яхшы йорт яны участогы”на ия булган Шакировлар гаиләсе дә бүләксез калмады. Бүләкләрне әзерләүдә Татарстан Республикасының яшьләр эшләре, спорт һәм туризм министры Рафис Борһанов ярдәм иткән. Бу чара үзе дә урам бәйрәме буларак аның тәкъдиме белән үткәрелде.
Бәйрәм булгач җыр–биюсез дә үтми. Беренче мәктәпнең “Карусель” әдәби төркеменең музыкаль–хореографик композициясе, яшь җырчы Илүзә Галимуллинаның җырлары, 5нче гимназия, 7нче мәктәпнең әдәби коллективлары, 2нче мәктәп кадетлары, Арча педагогика көллиятенең “Патриот” клубы, “Ар–и–Эль” бию коллективы чыгышлары сугыш, тыл, хезмәт ветераннарына бүләк булып яңгырады, бәйрәмне тагын да ямьләндереп җибәрде.
Гөлсинә ЗӘКИЕВА