Төзелешләр дәвам итә

Төзелешләр дәвам итә
Гражданнарны авария хәлендәге тораклардан күчерү программасын тормышка ашыру өчен Татарстан Республикасы муниципаль берәмлекләренә 99,89 млн. сум акча бүлеп бирелгән.
“Бу торак–коммуналь хуҗалыгын үзгәртеп коруга ярдәм фонды акчасының 30 проценты”, — дип хәбәр итте төзелеш һәм торакларны файдалануга тапшыру буенча республика киңәшмәсендә Татарстан Республикасының төзелеш, архитектура һәм торак–коммуналь хуҗалыгы министры Ирек Фәйзуллин.
Киңәшмә Татарстан Республикасының Хөкүмәт йортында республиканың барлык муниципаль берәмлекләре белән видеоконференция режимында үтте һәм анда Татарстан Республикасы Президенты Рөстәм Миңнеханов, Татарстан Республикасы Премьер–министры Илдар Халиков катнашты. “Фонд акчасының калган 70 проценты төзелгән контрактлар һәм сатып алу килешүләрен муниципаль берәмлекләр тапшырганнан соң күчерелә”, — диде Ирек Фәйзуллин. Аның сүзләре буенча программада 29 муниципаль берәмлек катнаша. 2012 елда программага 77 күпфатирлы йорт кергән. Программаны финанслауның гомуми күләме 604,6 миллион сум. Авария хәлендәге 608 торак бинада яшәүче 1610 кеше күчәчәк. Гомуми мәйданы якынча 20 мең 196 квадрат метр.
Безнең Арча районында да бу мәсьәләгә зур игътибар бирелә. Шушы программаны тормышка ашыру һәм авария хәлендәге йортларда яшәүчеләрне күчерү максатыннан 2011 елда Арча шәһәренең М.Җәлил урамында 15 фатирлы торак йорт төзелде. Аның гомуми мәйданы 749,2 кв.метр. Татарстан Республикасы һәм Россия Федерациясе бюджетыннан 16,363 млн. сум акча бирелде. Нәтиҗәдә, М.Җәлил,6, Мәктәп,54 һәм Галактионов,38нче авария хәлендәге йортлар сүтелде һәм аларда яшәүчеләр әлеге 15 фатирлы йортка күчте.
Тузган торакларда яшәүчеләрне яңа фатирларга күчерү программасы буенча быел да эш дәвам итә. Шушы максатта Зур урамда 9нчы номерлы йорт төзелә. Көзгә аны файдалануга тапшыру планлаштырыла. Бу 15 фатирлы йортка Зур урам,9, Галактионов,36, Садовая,2, Интернационал, 27 йортларда яшәүче гаиләләрне күчерү күздә тотыла. Әлеге бинаны “Энергосервис” ширкәте төзи. Бүген биредә эш кызу темплар белән бара. Бөтен уңайлыклары булган, шәһәрнең нәкъ үзәгендәге яңа фатирлар озакламый үз хуҗаларына тапшырылачак, ә тузган тораклар сүтеләчәк.
Социаль ипотека буенча йортлар төзү дә дәвам итә. 2011 елда Банк урамында 12 фатирлы 5 йорт төзелде, 60 гаиләгә яңа фатирлардан ачкычлар тапшырылды. 2012 елда Мәктәп урамындагы 15 фатирлы 54нче йорт, Зәйнуллин урамындагы 12 фатирлы 13а номерлы йорт, Көнбатыш микрорайонында 12 фатирлы 6 йорт төзелеп, фатирлар ияләренә тапшырылачак. Хәзерге вакытта Интернационал урамында 60 фатирлы 5нче номерлы йорт төзелә башлады. Бу Арчада беренче 5 катлы йорт булачак.
Татарстан Республикасы төзелеш, архитектура һәм торак–коммуналь хуҗалыгы министры хәбәр итүенчә, авыл клублары төзелешенә Татарстан Республикасы бюджетыннан 461 млн. сум акча бүленеп бирелгән. Бүгенгә подряд оешмалары билгеләнгән, тиешле документация рәсмиләштерелгән, авыл клубларының проекты тәкъдим ителгән һәм эшләнгән.
Арча станциясендә Һади Такташ урамында 300 урынга исәпләнгән яңа күпкырлы мәдәни үзәк төзелә. Бүген биредә эш бара инде. Аны 30 августка — Республика көненә файдалануга тапшыру планлаштырыла.
Гөлсинә ЗИННӘТОВА