Район Советы утырышы

Район Советы утырышы
17 майда икенче чакырылыш район Советының чираттагы XVIII утырышы булды. Аны муниципаль район башлыгы, район Советы рәисе Алмас Назиров ачты һәм алып барды.
Утырышта финанс–бюджет палатасы рәисе Фәнис Исмәгыйлев “2011 елда Арча муниципаль районының бюджеты үтәлеше турында” чыгыш ясады.
Район башкарма комитеты җитәкчесенең беренче урынбасары Рафил Исмәгыйлев Арча район Советының 2012 елның 17 февралендәге “Арча муниципаль районында авыл халкының эшчәнлек активлыгын күтәрү һәм шәхси ярдәмче хуҗалыкларны үстерү турында”гы 108 номерлы карарының үтәлеше турында сөйләде. Аның чыгышыннан күренгәнчә, соңгы елларда авылда яшәүчеләрнең активлыгы үсә. Хәзерге вакытта 852 хуҗалык — 2, 203 хуҗалык — 3, 31 хуҗалык — 4, 13 хуҗалык — 5, 2 хуҗалык — 6, 4 хуҗалык — 7, 4 хуҗалык — 8, 1 хуҗалык 10 баш сыер асрый. Өч һәм аннан да күбрәк сыер асраучы кешеләргә ташламалы шартларда саву аппаратлары бирелде.
Бүгенге көндә 17 гаилә фермасы эшли, аларда 1101 баш мөгезле эре терлек, шул исәптән 327 сыер бар. 2011–2012 елларда 11 кеше ферма төзүгә 14,62 млн. сум дәүләт ярдәме алды.
Апаз, Иске Кырлай авыл җирлекләре башлыклары Ренат Садыйков, Фәргать Сираҗетдинов әлеге җирлекләрдә халыкның активлыгын арттыру, шәхси ярдәмче хуҗалыкларны үстерү буенча тәҗрибә уртаклаштылар.
Депутатлар кабул иткән карарда район башкарма комитетына, авыл хуҗалыгы һәм азык–төлек идарәсе белән берлектә, Арча муниципаль районы территориясендә 2012–2015 елларга кече эшмәкәрлекне һәм ярдәмче хуҗалыкларны үстерү программасы эшләргә тәкъдим ителә. Дүрт авыл җирлеге базасында авыл җирлекләрен социаль–икътисадый үстерү планын кабул итәргә. Өч һәм аннан күбрәк сыер асраучы хуҗалыкларга ташламалы шартларда саву аппаратлары бирү дәвам итәчәк.
Алмас Әминович эшмәкәрлекне үстерү буенча авыл җирлекләре арасында үткәрелүче конкурс шартларын игълан итү һәм йомгак ясау срокларына ачыклык кертергә тәкъдим итте. Ул шулай ук пай җирләрен бирүне закон кысаларында тәртипкә салырга чакырды. Мондый әһәмиятле карарлар бары тик пайчыларның гомуми җыелышында һәм һәр якның да мәнфәгатьләрен күздә тотып, үзара килешеп кабул ителергә тиеш.
Район башкарма комитеты җитәкчесе Илшат Галимуллин “2012 елда Арча муниципаль районында санитария–экология хәлен яхшырту буенча икеайлык үткәрүнең барышы турында” чыгыш ясады.
Район территориясендә 2012 елның 1 апреленнән 1 июненә кадәр тирә–якны төзекләндерү, яшелләндерү, санитария–экология хәлен яхшырту буенча икеайлык бара.
Ай ярым эчендә шактый эшләр башкарылды: өмәләр үткәрелде, чишмәләр төзекләндерелде, автобус маршрутлары павильоннары буялды, агачлар утыртылды, Бөек Җиңү көне уңаеннан обелисклар яңартылды, һәйкәлләр тәртипкә китерелде, юллардагы чокырлар күм-дерелде, законсыз рәвештә эшләнгән чүплекләр ачыкланып, юкка чыгарыла. Бүгенге көндә 2012 елның ныклап төзекләндерү буенча муниципаль адреслы программасына кертелгән күп фатирлы 7 торак йортның түбәсен һәм фасадларын төзекләндерү, газоннарны яңарту, коймаларны һәм балалар өчен уен мәйданчыкларын төзекләндерү һ.б. эшләре башкарыла.
Тирә–ягыбыздагы чисталык, тәртип — ул сәламәтлегебез, уңай тормыш шартлары, экологик культурабыз. Бар кеше икеайлыкта актив катнашырга тиеш.
Депутатлар утырышта каралган мәсьәләләр буенча карарлар кабул иттеләр. Алар белән сез районның рәсми сайтында (http//arsk.tatar.ru) таныша аласыз.
Муниципаль район башлыгы Алмас Назиров утырышта күтәрелгән мәсьә-ләләрнең мөһимлеген ассызыклады, алда торган бурычларга тукталды.