Хәрәкәттә — бәрәкәт

Хәрәкәттә — бәрәкәт
“Кырлай” ширкәтенә кайчан килсәң дә ни дә булса төзиләр. Иске Кырлайда өч торакны үзгәртеп корганнар иде инде, сыерлар өчен тагын ике торакны яңарталар. Сиксән сыерга исәпләнгән бозаулату бүлеге төзелә.
Иң зур төзелеш — Өтнә елгасында. Биредә мул сулы буа булачак. Быел ширкәт 300 гектарда сугарып бәрәңге үстерәчәк. Узган ел 150 гектарда эшләп күрсәттеләр инде, уңышның муллыгына искитәрлек иде.
Элегрәк бер атаклы галимнең: “Без табигатьтән рәхимлекләр көтеп тора алмыйбыз. Аларны аннан алу — безнең бурыч”, — дигән сүзләре бик популяр иде. Һәр елны корылык куркыта башлагач, сугару системалары безнең шартлар өчен аеруча кирәклеге ачыкланды. Дәүләт, махсус программа булдырып, аңа керә алганнарга ярдәмен кызганмый. Буалар төзү, сугару җайланмалары бәясенең яртысы — федераль, яртысы — республика бюджеты исәбенә. Әмма болар бар да нәтиҗәле хезмәт белән акланырга тиеш.
“Кырлай” ширкәтендә 200 һәм 325 гектарлы — ике, “Игенче”дә 350 гектарда сугарулы участок булачак. Өтнә басуында сугару системасын монтажлыйлар. Әлеге басуда бәрәңге утырту бара. Бер агрегат элегрәк утыртылган участокта рәт араларын эшкәртүгә керешкән. Мамыктай йомшак туфрактан өелгән буразналарга карап сокланасың, рәхәттер андагы бүлбеләргә! Фидәрис Зарипов белән Ленар Һадиев (рәсемдә) ике агрегатта бәрәңге утырталар. Сменага 12шәр гектар утыртабыз, диләр. Без күреп күнеккән бәрәңге утырткыч түгел инде болар, шунда ук ашламасын да кертә, бүлбеләрне фитофтороз, каты корт, колорадо коңгызларына каршы да эшкәртә. Бу басуларда чүп үлән, авырулар, корткычлар булмаячак. Шулар өстенә кирәк вакытта яңгыр да “яудырып” торачаклар.
Мондый технология белән үстерелгән бә-рәңге кибет киштәсендә дә озак ятмый, халык аны бик яратып ала. Иске Иябашта бәрәңге, яшелчә саклау, эшкәртү өчен үз цехлары эшләнеп бетеп килә. Кыскасы, булганны әрәм итмәячәкләр. Сөтне дә бит әнә үзләре эшкәртә, ашлыктан катнаш азык ясый.
Ильяс ФӘТТАХОВ