Машина йөртергә өйрәтүчеләр ярыша

Машина йөртергә өйрәтүчеләр ярыша
Арча РОСТО (ДОСААФ) оешмасы, 2012 елның биш аенда гына да берничә тапкыр республика ярышларында һәм бәйгеләрендә катнашып, пьедесталның иң югары баскычына күтәрелде. Һәм менә яңадан оешманың производствога өйрәтү остасы һәм укытучылары беренче урында.
13 майда Арча РОСТО (ДОСААФ) оешмасы базасында 7 районның автомәктәпләре производствога өйрәтү осталары һәм укытучылары арасында “Автошөгыль остасы — 2012” дигән ачык зона шәхси–команда беренчелеге булды. Анда Арча, Саба, Балтач, Кукмара, Теләче районнарыннан килгән 12 командадан 40ка якын кеше катнашты.
— Мондый ярыш әле республикада беренче тапкыр үткәрелә. Максаты – машина йөртергә өйрәтүче оста һәм укытучыларның үзләренең белемнәрен тикшерү. Алар кешеләрне руль артына утырып юлга чыгару өчен әзерли, димәк, үз хезмәтләрен һәм юл йөрү кагыйдәләрен бик яхшы белергә тиеш. Шул очракта укучыларыннан да курыкмыйча шуны таләп итә алалар. Ә укучыларының имтиханны яхшы бирүе укыту да әйбәт барган дигәнне аңлата. Безнең Арча районы бу өлкәдә әлегә алда бара, киләчәктә дә шулай булырга тиеш. Мондый ярышларны үткәрүне дә традициягә кертәчәкбез, — диде Арча РОСТО (ДОСААФ) оешмасы җитәкчесе Ринат Алеев.
Ярышлар ике этапта һәм “В” — җиңел автомобиль, “С” — йөк автомобиле категорияләре буенча ике төркемгә бүленеп үтте. ЮХИДИ Арча бүлекчәсенең теркәү һәм имтихан алу буенча районара бүлеге җитәк-чесе, полиция майоры Илдар Нотфуллин һәр катнашучыга карата бик таләпчән булды. 2012 елда иң яхшы автомобиль йөртергә өйрәтү остасын билгеләү аңа йөкләнгән иде.
Теоретик этапта барысына да компьютерда вакытка һәм билет сорауларына хатасыз җавап бирергә туры килде (рәсемдә). Чөнки юлларда куркынычсызлык ул оста машина йөртүдән генә тормый, ә юл хәрәкәте кагыйдәләрен бик яхшы белүгә дә бәйле. Теория буенча барысы да уңай нәтиҗәгә иреште. Әмма арчалылар өлгеррәк һәм төгәлрәк булып чыкты. 50 рекордлы секунд эчендә билет сорауларына җавап биреп, “В” категориясе буенча укытучылар арасында Рөстәм Алеев җиңде. “С” категориясендә педагоглар арасында Ленар Валеуллов беренче булды. Ул билетны 52 секундта чиште. Арчаның икенче командасыннан Арча РОСТО автомәктәбе укытучысы Илшат Гайнетдинов һәм РОСТО (ДОСААФ) район оешмасының Яңа Кенәр лицее базасындагы автосыйныф укытучысы Альфред Габдрахманов яхшы күрсәткечләргә ирештеләр.
Ә менә производствога өйрәтү осталарына теория- дән тыш Арча автодромында машина йөртү күнекмәләрен дә күрсәтергә туры килде. Алар биредә дүрт стандарт күнегү күрсәттеләр. Монда да безнең осталарга тиңнәр булмады. Ринат Хәкимов, Марсель Галимҗанов, Әнис Шәймәрданов, Роберт Камалетдинов, Габделфәрт Сәфәров, Илнар Гыйбадуллин чын профессионалларның ничек йөргәнен күрсәттеләр. Ә гомуми нәти-җәләргә килгәндә, “В” категориясендә теория һәм машина йөртү буенча Арча РОСТО (ДОСААФ) оешмасының Шушмабаш мәктәбе автосыйныфында машина йөртергә өйрәтүче оста Әнис Шәймәрданов беренчелекне бирмәде. “С” категориясендә Марсель Галимҗановны берәү дә “уза” алмады.
Командалар арасында да Арча РОСТО (ДОСААФ) оешмасы беренче булды. Икенче — Арча агросәнәгать һөнәри көллияте, өченче урында Балтачның 96нчы һөнәри лицее. Теләче РОСТО (ДОСААФ) оешмасы, бик азга гына калышып, дүртенче булды.
“Автошөгыль остасы — 2012” ярышлары Арча эчке эшләр бүлеге җитәкчесе Айдар Баһавиевның контрольлегендә үтте.
— Татарстан Республикасы ЮХИДИ идарәсе җитәкчесе Рифкать Миңнехановка Арчага гражданнар белән очрашуга кайткач машина йөртүчеләр әзерләүче укытучыларның белемнәрен тикшерү өчен бәйге үткәрү буенча фикерләребезне җиткергән идек. Ул моны хуплап кабул итте. Һәм менә республикада беренче тапкыр шундый ярышка җыелдык. Бу бик кирәкле чара. Чөнки хәзер юлларда машиналар күп. Юл һәлакәтләре дә еш булып тора. Сәбәбе — юл хәрәкәте кагыйдәләрен бозу, машина йөртүчеләрнең бер–берсенә карата әдәп сакламаулары, юл бирмәүләре, игътибарсызлыклары. Техника артканга карап машина йөртү сыйфаты яхшырмый. Аннан юл хәрәкәте кагыйдәләре дә яңарып тора, законнар үзгәрә, яңа стандартлар барлыкка килә. Машина йөртергә өйрәтүчеләр аларның барысын да яхшы белергә һәм укучыларына җиткереп барырга тиеш. Ә моның өчен үз белеме дә югары дәрәҗәдә булырга тиеш, — диде Айдар Рашатович.
Соңыннан Арча РОСТО (ДОСААФ) оешмасы рәисе Ринат Алеев җиңүчеләргә кыйммәтле бүләкләр һәм грамоталар тапшырды.
Гөлсинә ЗӘКИЕВА