Пионериягә 90 яшь

Пионериягә 90 яшь
Пионерия юбилее кайчандыр кызыл галстук таккан, пионер исемен горур йөрткән өлкәннәр өчен дә, хәзерге варислар өчен дә олы бәйрәм. 90 еллык тарихы булган чал чәчле пионерия үзенең дәрте, энергиясе белән йөрәкләргә сеңеп калды.
Шуңа Яңа Кенәр лицеенда әлеге олы юбилейга багышлап үткәрелгән бәйрәм берәү-не дә битараф итмәде, йөздә елмаю уятты, балачакның матур хатирәсе буларак күңел кылларын тибрәтте, йөрәкләрдә ялкын кабызды.
Бәйрәмгә килүчеләрне ул көнне лицей укучылары һәм укытучылары ачык йөз белән каршы алдылар, татар халкының милли ризыгы чәк–чәктән авыз иттерделәр. Очрашуга килүчеләрне Арча районы башкарма комитеты җитәкчесе урынбасары Надия Мифтахетдинова сәламләде.
— Бүген без пионериянең 90 еллыгын билгеләп үтәргә җыелдык. Бу олы бәйрәм һәрберебез өчен якын һәм кадерле. Ул укучыларны һәркемгә үрнәк булырга, өлкәннәрне ихтирам итәргә өйрәтте, хезмәткә мәхәббәт тәрбияләде. Бүген варислар дип аталсагыз да, сезнең күңелләрегездә пионерия ялкыны дөрли. Киләчәктә дә бу исемне горур йөртегез, — диде ул һәм легендар шәхесләр, бөтен гомерләрен пионер хәрәкәтенә багышлаган мәңге яшь пионервожатыйлар Әлфия Бәдретдинова, Луиза Сабирова, Розалия Насыйбуллинаны район башлыгы Алмас Назиров исеменнән пионерия бәйрәме белән котлап, иңнәренә ак шәл салды.
Гомере буе пионервожатый булып эшләгән, әле дә тынгы белмәс пионер хәрәкәте ветераны Луиза Сабирова барысын да пионериянең 90 еллыгы белән котлады һәм пионерларның гимнына әверелгән “Взвейтесь кострами”ны җырлады.
Пионер хәрәкәте ветераны Әлфия Бәдретдинованың үзенә дә быел 90 яшь тула. Өлкән кеше буларак аның да балаларга әйтер сүзе бар. “Пионер һәркемгә үрнәк булырга тиеш. Аның исеменә тап төшермәгез, авырлыклар алдында баш имәгез, кеше булып калыгыз”, — диде ул.
Район мәгариф идарәсе Әлфия Бәдретдинова исемендәге премия булдырган иде. Ул ел да иң яхшы педагог–оештыручыга тапшырыла. Быел бу бүләкне Әлфия апаның үз кулыннан Өчиле мәктәбеннән Венера Гарипова алды.
— Хәзер пионерның ничек аталуы мөһим түгел. Без аның менә шундый янып эшләгән кешеләре тудырган традицияләрен саклыйбыз, — диде район мәгариф идарәсе җитәкчесе Рина Бәдриева.
Бу көнне котлаулар да, бүләкләр дә күп булды. Яңа Кенәр лицее агитбригадасы чыгыш ясады, яшь үзешчәннәр концерт куйды.
— Сезнең эшләрегез, шөгыльләрегез дуслык мине сокландырды. Киләчәктә ул дәвам итсен, ныгысын, чәчәк атсын, — диде “Татарстан — Яңа гасыр” республика иҗтимагый хәрәкәте Политсоветы башкарма комитеты рәисе Алсу Тарханова.
Бәйрәмнең тантаналы өлешеннән соң укучылар “эшкә” кереште. “Экстрим” сюжетлы–рольле уенда алар, берничә станциядә булып, файдалы очрашуларда катнаштылар. Арча үзәк хастаханәсе наркологы Рөстәм Әхмәтҗанов, район эчке эшләр бүлегенең балигъ булмаганнар белән эшләү бүлекчәсе өлкән инспекторы Алсу Һидиятуллина, инспекторы Йолдыз Гарипова, Арча янгын бүлегенең Яңа Кенәр аерым посты җитәкчесе Хәниф Әхмәтов балалар белән әңгәмәләр үткәрделәр, сорауларга җаваплар бирделәр. Яңа Кенәр лицее шәфкать туташы Гөлфия Хәбибуллина беренче медицина ярдәме күрсәтү серләренә төшендерде. Укучылар ничек команда тупларга икәнен дә өйрәнделәр (рәсемдә), яшь туристларга походларга чыкканда файдаланырга киңәшләр бирелде. Алсу Тарханова “Җир Хартиясе” принциплары белән таныштырды, Арча укучылар сараеның “XXI гасыр яшьләре” клубы әгъзалары балаларны бию залына чакырдылар, бергәләп пионер җырларын искә төшерделәр, җыйнаулашып дуслык флагы тектеләр, кинолог, полициянең өлкән прапорщигы Илшат Әсхәдуллин белән очраштылар, наркотиклар “сатучыны”, аннан “товар”ның үзен эзләделәр. Аннан бәйрәм табигать кочагында дуслык учагы янында дәвам итте.
Пионерия юбилеена кунакка Мари Иленнән дә укучылар (аларда безнең варислар эрвиецлар дип йөртелә) килгән иде. Кунакларга да бәйрәм бик ошады. Гомумән, һәркем бәйрәмнән җылы хисләр, матур истәлекләр белән таралды.
Гөлсинә ЗӘКИЕВА