Хезмәт кешесенә мәдхия

Хезмәт кешесенә мәдхия
Ярты гасырга якын колхоз рәисе булып эшләгән легендар шәхес Фәйзи ага Галиев Җиңү көне алдыннан муниципаль район башлыгы Алмас Назиров белән очрашканда: “Мин өч яшьтән башлап барын да хәтерлим”, — дигән иде. Аның сөйләгәннәрен күпме тыңласаң да, туярлык түгел.
Фәйзи ага бик пөхтә, төгәл кеше. Ул гомере буе үзе күргәннәрне теркәп барган, документларны саклаган, бай архив туплаган.
Ул, менә шушы байлыкны китаплары аша укучыларга да җиткереп, гаять игелекле хезмәт башкара. Әле яңа нәшер ителгән “Фәйзи Галиев” дигән китабын зур кызыксыну белән кулга аласың. Аның элегрәк чыккан китаплары да бер сулыш белән укыла. “Мин — авыл баласы. Авыл минем бөтен тормышым, бишегем, әби–бабаларымның, гомумән, нәселемнең беренче буразнасы. Авыл — минем бөтен барлыгым, сулар һавам, эчкән суларым, нәселемнең дәвамы. Авыл — минем балачагым, сугыш еллары, сугыштан соңгы михнәтләр һәм дә килеп шул чорның һәм бүгенгенең гүзәл кешеләре. Сезгә тәкъдим ителә торган язмаларым да күңелдәге хисләрем. Аларның кайберләре тарих өчен дип язылды”, — ди автор яңа китабының кереш өлешендә.
21 майда “Казан арты” тарих–этнография музееның актлар залында Фәйзи аганың яңа китабын тәкъдир итү булды. Анда аның чордашлары, фронтташ дуслары, хезмәттәшләре дә катнашу кичәне тагын да тулырак итте. Район башкарма комитеты җитәкчесе урынбасары Надия Мифтахетдинова (рәсемдә) үзенең чыгышында арчалыларның Фәйзи ага Галиев белән горурлануларын, аны һәрвакыт истә тотуларын әйтеп үтте. Фәйзи ага гомерен халыкка хезмәт итүгә багышлаган шәхес, ул яңа китабында да хезмәт кешесенә дан җырлый.
Кичәне район балалар китапханәсе мөдире Алсу Рәхимбаева бик матур, күңелләргә хуш килерлек итеп алып барды. Ул ялыктырмый гына безне китапның эчтәлеге, авторның хезмәт һәм тормыш юлы белән таныштырды. Фәйзи ага белән бер чорда колхоз рәисләре булып эшләгән Наил Сабиров, Мансур Касыймов, фронтташ дусты Кыям Җәләлиев, ветераннар Илдус Сәгъдиев, Шамил Вәлиев, Ренат Фазлыәхмәтов хатирәләрне яңарттылар. Расих Галимҗанов, Сөмәя Җиһаншина, “Чишмә” ветераннар ансамбле матур җырлар һәм көйләр бүләк итте.
Фәйзи ага Галиев шулай олылаулары өчен район җитәкчелегенә, кичәдә катнашучыларга рәхмәт әйтте, һәммәсенә бәхет, уңышлар теләде.
Ильяс ФӘТТАХОВ