Сабантуйда җиңүчегә булсын бүләгем

Сабантуйда җиңүчегә булсын бүләгем
Сабантуй якынлаша! Аны һәрберебез зарыгып көтеп ала. Юк, бәйрәм итәргә, күңел ачарга сәбәп кенә түгел бу, ә әби–бабаларыбызның электән килгән матур йолаларын дәвам итү, хөрмәтләү, аны балаларыбыз, оныкларыбызга җиткерү.
Әбиләребез сөйләгәнне күз алдына китерсәң, ирексездән аларга карата соклану хисе туа. Алар кышкы озын көннәрдә аулак өйләрдә, кич утыруларда Сабантуйга бүләк җыйганда тапшыру өчен дип ашъяулыклар, сөлгеләр чиккәннәр, ат чабышында беренче һәм соңгы килүчегә махсус адарынып бүләкләр әзерләгәннәр. Ә бүләк җыю үзе җырлы–биюле кичәгә әверелгән.
Минем балачагым авылда үтте. Сабантуйга бүләк җыю күренешен күпме гомер үткәннән соң да бүгенгедәй хәтерлим. Иртәдән иң матур күлмәкләребезне сандык төбеннән чыгарып, киенеп куябыз, безне күрсеннәр, дип бер–ике тапкыр урам әйләнеп кайтабыз, аннан түземсезлек белән бүләк җыючыларны көтәбез. Гармун тавышлары ишетү белән бер аяк өйдә, икенчесе урамда була. Ул җыр, бию бөтен урамны яңгырата. Бүләк колганың иң очына бәйләнсә, горурлык хисе уяна. Шул кыңгыраулы атлар артыннан бала–чага иярә. Иң соңыннан тау башында балалар Сабантуе үткәрелә. Аеруча хәтергә сеңеп калганы — Сабантуйның нәкъ менә шушы өлеше.
Печмәнтауда моннан тыш йомырка җыю гадәте дә бар икән әле. Бу да элек–электән килеп матур традициягә әверелгән. Һәр йортта кичтән күп итеп йомырка пешерәләр, аларны буйыйлар, конфет–печеньесын әзерләп куялар. Икенче көнне иртәнге биштә барысы да капканы төбенә кадәр ачып куеп нәни кунакларны — өйдән–өйгә йөреп йомырка җыючы балаларны каршы алырга әзер булып тора.
Безнең Арчада да соңгы елларда Сабантуйга бүләк җыю үзенчә бер бәйрәм төсен хәтерләтә башлады. Милли костюмнардан кызлар, егетләр, гармун тартып, җыр сузып, капка төбенә килеп туктыйлар. Яшь чакларны искә төшереп, күңелләр җилкенеп куя, күзләргә ирексездән яшь килә. Аннан исәнлек–саулык, тынычлык, иминлек теләп, әзерләп куйган бүләгең колга башында урын ала. Балачак хатирәсе шулкадәр күңелгә сеңеп калган, моны күреп әле дә күңел сөенеп куя, рәхәт булып китә.
Быел да “Бердәм Россия” сәяси партиясенең җирле бүлекчәсе, Арча Мәдәният йорты, район ветераннар советы шәһәр Советы белән берлектә Сабантуйга бүләк җыю бәйрәме оештырырга әзерләнә. 28 майдан кичке алтыдан соң бөтен теләкләрегезнең чынга ашуын теләп, әзерләгән әйберләрегезне сандык төбеннән чыгарып, бүләк җыючыларны көтегез. Сабантуйда сез биргән яулык, сөлге, ситсылар уеннарда, ярышларда, көрәштә җиңүчеләр кулында булачак. Ә бу әби–бабаларыбыз традицияләрен дәвам итүгә сезнең дә өлешегез керде, дигән сүз. Сабантуйлар котлы булсын! Ул илебезгә тынычлык, йортыбызга иминлек иңдерсен.
Гөлсинә ЗӘКИЕВА