Бүләкләргә бай бәйрәм

Бүләкләргә бай бәйрәм
Әбүнәчеләр көнен үткәрү соңгы вакытта популярлашып китте һәм матур традициягә үк әверелеп бара. Менә бу юлы да ул үзенчә зур гына бәйрәмне хәтерләтте һәм хәтта ике көнгә сузылды.
— Бу юлы әбүнәчеләр көне бүләкләргә аеруча бай. Ә аларны ияләренә хат ташучылар үзләре илтеп бирәчәк. Күреп торасыз: кеше күп килә. Алар арасында беренче килүчеләр дә, шушы көнне көтеп алучылар да бар. Газета–журналларга язылучыларның бу бәйрәмнән канәгать булып китүләре безнең өчен дә сөенеч, — ди Арча почта бүлекчәсенең газета–журналларга язылу буенча инженеры Рәсүлә Гафарова.
Форсаттан файдаланып үз басмаларын тәкъдим итәргә кайбер Казан редакцияләреннән дә килгәннәр иде. Буш кул белән дә түгел. Һәр язылучыга бүләк.
— Безнең “Акчарлак” газетасы редакциясендә тагын берничә төрле исемдә газета чыгарыла. Бүген кем “Акчарлак”ка яки “Уртак хис”ләргә, яисә башка үзебезнең басмаларга ярты елга языла, без аңа бүләк тапшырдык һәм өстәмә бер айга бушка “Татар хатыны” газетасына яздырдык, — диләр “Татар хатыны” газетасы мөхәррире Лилия Заһидуллина һәм газета–журналларга язылу буенча менеджер Алсу Мифтахова.
“Сөембикә” журналы редакциясеннән бүлек мөдире, журналист Лилия Гәрәеваның да бүләкләре күп иде. “Казанские ведомости” газетасы редакциясенең газета–журналларга язылу бүлеге җитәкчесе Дания Харисова да буш кул белән килмәгән.
— Мондый чаралар һәркайда зур оешканлык белән үтә. Газета–журналларга язылырга килүчеләргә үзләре яратып укыган басмалар журналистлары белән аралашу, өстәвенә алар кулыннан бүләк алу үзе күңелле, — ди “Татарстан почтасы” идарәсенең газета–журналларга язылу һәм заказлар эшкәртү бүлеге җитәкчесе Алевтина Федорина.
Икенче көнне биредә “Кәеф ничек?” газетасы һәм “Булгар FM” радиосы хезмәткәрләре үзләре бер бәйрәм оештырды. Һәр язылучыга алар “Тамаша” дисконт картасы һәм бүләкләр тапшырдылар, биеттеләр, уеннар уйнаттылар. Татар эстрадасының яшь җырчысы Илназ Сафиуллин яраткан җырларын башкарды.
Үзебезнең почта хезмәткәрләре дә бүләкләр әзерләгән иде. Аларның шундый күңелле чара оештырып, газета–журналларга язылырга килүчеләрне сөендерүләре үзе зур бүләк.
Гөлсинә ЗӘКИЕВА