Авылның киләчәге матур булыр

Авылның киләчәге матур булыр
Россия авыл хуҗалыгы министры Николай Федоров 29 майда эш сәфәре белән Казанга килде. Ул анда Азия–Тын океан регионы (АТЭС) илләренең авыл хуҗалыгы министрлары киңәшмәсендә катнашты.
Әлеге очрашуда регионда тотрыклы азык–төлек куркынычсызлыгын үстерү, авыл хуҗалыгы продукциясе экспорты һәм импорты инфраструктурасын камилләштерү, агросәнәгать комплексында шәхси инвестицияләрне стимуллаштыру мәсьәләләре каралды.
30 майда Николай Федоров Арча районының Сикертән сөтчелек мегакомплексында булды. Аны ТР авыл хуҗалыгы һәм азык–төлек министры Марат Әхмәтов озатып йөрде. Кунакларны муниципаль район башлыгы Алмас Назиров каршы алды (рәсемдә). Алмас Әминович мөхтәрәм кунакны район тормышы белән таныштырды, ирешкән уңышлар, киләчәккә планнар турында сөйләде.
Николай Федоров мегаферманы карады, эш шартлары, күрсәткечләр белән кызыксынды. “Ак Барс–агро” ширкәте генераль директоры Шәйдулла Сәлахов, комплекс җитәкчесе Айрат Гәрәев хуҗалык һәм комплекс эшчәнлеге белән таныштырдылар. Комплекста Австралиядән кайтарылган токымлы, мул сөт бирергә сәләтле сыерлар асрала. Россия министры уртача савымны елга 8–10 мең килограммга җиткерү өчен тырышырга кирәклеген әйтте. Ул шулай ук авылларның киләчәге якты булачагына өмет чаткылары уятты. Иң мөһиме — авылны социаль үстерү федераль программасы әзерләнә. Анда авылның инфраструктурасын үстерүгә зур урын биреләчәк.
— Шәһәр белән авыл арасында аерма бетәргә тиеш, — диде министр. — Монда шәһәрнең тискәре якларыннан тыш сыйфатлары турында сүз бара. Яхшы юллар, мәгариф, сәламәтлек саклау һ.б. шәһәр дәрәҗәсенә җитәргә тиеш.
Журналистлар белән әңгәмәдә Николай Федоровка Россиянең Бөтендөнья сәүдә оешмасына керүенә бәйле сорау да бирелде.
— Иң мөһиме — курыкмаска, паникага бирелмәскә кирәк, — диде ул. — Яңа эшкә башта өйрәнергә, яраклашырга. Көндәшлеккә яраклы, кеше сәламәтлегенә зыян китерми торган продукция җитештерергә.
Николай Федоров Татарстанның күп мәсьәләләрдә үрнәк булып торуын билгеләп үтте. Ул үзе дә Татарстанны кече ватаны дип саный. Казан дәүләт университетының юридик факультетын тәмамлаган. 16 ел ярым Чувашия Республикасы Президенты булып эшләгәндә дә элемтәләр нык булган.
Ильяс ФӘТТАХОВ