Алар безнең сафта

Алар безнең сафта
29 майда Арча үзәк китапханәсендә Бөтенроссия сукырлар җәмгыятенең Арча җирле оешмасы исәп–хисап конференциясе булды. Оешма секретаре Ләйсән Зарипова башкарган эшләре турында сөйләде, киләчәккә планнары белән таныштырды.
Бүгенге көнгә оешмада 127 кеше исәптә тора һәм ул Арча, Әтнә, Балтач, Биектау районнарында яшәүче күзләре күрмәүче инвалидларны берләштерә. Җитәкчесе — Зөфәр Зарипов.
Язмыш бу кешеләрне үзенчә сынаган. Әмма, күзләре күрмәгәнгә карап, алар тормышта бернидән дә мәхрүм булырга тиеш түгел. Нәкъ менә шуны күздә тотып оештыра да инде үзенең эшен әлеге җәмгыять.
— Халыкны социаль яклау идарәсе, Мәшгульлек үзәге, мәдәният һәм мәгариф идарәләре, Пенсия фонды, шулай ук район ветераннар советы белән тыгыз элемтәдә торуыбыз, хезмәттәшлек итүебез күзләре күрмәү буенча инвалидларның проблемаларын чишүдә булыша. Район җитәкчелегенең дә ярдәме зур. Мохтаҗларга фатирлар бирелде, район бюджеты исәбеннән фатирлары төзекләндерелде. Булышырга әзер торган иганәчеләребез дә бар. Шундыйлардан шәхси эшмәкәрләр Рәмзия Сибагатова, Фаил Гәрәев, Руслан Касыймов, Алимас Әмировка рәхмәтлебез. Үзләрен тулы хокуклы гражданнар итеп тойсыннар өчен без дә аларга һәрьяктан ярдәм итәргә тырышабыз, — диде үзенең чыгышында Ләйсән Зарипова.
Җәмгыятьтә күрмәүче инвалидларны эшкә урнаштыру, балаларны укырга кертүдә булышу буенча да зур эш башкарыла. Мәмсәдән Нияз Шакиров, мәсәлән, югары белем алып, хәзер мәктәптә эшли. Арчадан Азалия Низамиева Лаештагы махсус мәктәп–интернатка укырга кергән.
Оешма әгъзалары арасында район тормышында, мәдәният–спорт чараларында актив катнашучылары да бар.
— Рәхмәт оешма җитәкчеләренә. Актив кешеләр алар. Игътибарлы, яхшы мөгамәләдә, хәлләрне белеп торалар, концерт–спектакльләргә чакыру билетлары бирәләр, кирәк икән — ярдәм күрсәтәләр. Эшләреннән без тулысынча канәгать, — диде Бөтенроссия сукырлар җәмгыяте ветераны Нәкыйф Солтанов.
Конференциядә катнашучылар шулай ук борчыган сорауларын да җиткерделәр. Ташламалар, эшкә урнаштыру буенча үзләре өчен нинди үзгәрешләр булуы белән дә кызыксындылар, шифаханәләргә җибәрү тәртибе турында да сораштылар.
— Сезгә социаль пакет бирелә. Ул өч өлештән тора. Шуның бер өлеше шифаханә–курортларга баруны күз алдында тота. Дәваланырга барырга теләгән очракта социаль пакетның шуны күздә тоткан өлешен кире какмавыгыз кирәк. Аннан безгә чиратка басасыз. Ул электрон рәвештә алып барыла һәм шәхсән минем тарафтан контрольдә тора, — диде халыкны социаль яклау идарәсе җитәкчесе Рамил Гарифҗанов. Ул шулай ук инвалидларга акчалата ярдәм һәм тузган торакта яшәүчеләргә субсидиянең нинди очракта һәм ничек бирелүе турында да аңлатып үтте.
Конференциягә сукырлар һәм начар күрүчеләр өчен махсус республика китапханәсе директоры Наил Сәфәргалиев, Бөтенроссия сукырлар җәмгыяте төбәк оешмасының I категорияле белгече Алсу Хуҗина да килгән иде. Наил Ибраһимович эш тәҗрибәсе турында сөйләде, үзләренә кагылышлы яңалыклар белән таныштырды. Конференциядә район башкарма комитеты җитәкчесе урынбасары Надия Мифтахетдинова катнашты, сукырларның җирле оешмасы эшенә югары бәя бирде, теләкләрен җиткерде.
Гөлсинә ЗӘКИЕВА