Яңалыклар

Яңалыклар
5 ИЮНЬГӘ район хуҗалыкларында 850 гектарда (урыласы мәйдан — 22660 гектар) күпьеллык үләннәр урылды, 18 тонна витаминлы печән әзерләнде.
“Татарстан”, “Ватан” хуҗалыкларында 135–130 гектарда күпьеллык үләннәр урылды.
4 июньдә район хуҗалыкларында бер сыердан уртача 14,1 килограмм сөт савылды. Бу узган елның шул көнендәгедән 0,5 килограммга артык.

НОСЫ ТӨП ГОМУМИ БЕЛЕМ МӘКТӘБЕНЕҢ IV сыйныф укучысы Чулпан Латыйпова “Балалар илне сурәтли” дигән VI Республика конкурсында “ТРның тарихи–мәдәни мирасы” номинациясендә өченче урынны алды.


Май аенда Казан шәһәренең 20 номерлы гимназиясендә Г.Тукайның 126 еллыгы уңаеннан “Илһам чишмәсе” дигән шигырь бәйгесе уздырылган. Анда Урта Бирәзә башлангыч мәктәбе укытучысы Илфира Шакирова да катнашкан. Аның шигырьләре Татарстан Республикасы Мәгариф һәм фән министрлыгының II дәрәҗә дипломына лаек булган һәм китап җыентыгында урын алган.

“Теләсәгез — ышаныгыз, теләсәгез — юк!” дип аталган Бөтенроссия иншалар бәйгесендә Арча беренче мәктәбенең 5 “Б” сыйныф укучысы Азамат Мозаффаров катнашты. Аның эше икенче урынны алды һәм II дәрәҗә дипломга лаек булды. Укытучысы Ләйсән Надершина.

Балалар сәнгать мәктәбендә Арча педагогика көллияте музыка бүлегенең атказанган мәдәният хезмәткәре Флорид Гасыймов укучылары катнашында инструменталь музыка кичәсе булды. Өченче курс студентлары Рүзәл Галимов, Булат Хөрмәтов, бишенче курстан Илнур Шәймәрданов чыгышлары тамашачыларга бик ошады.

“Мәрхәмәтлек үзәгендә” “Волонтер” ирекле үзәге быелның апрель аенда гына төзелгән иде. Җитәкчесе — Җәмилә Яруллина. Аз гына вакыт эчендә волонтерлар — Арча педагогика көллияте студентлары үзләрен уңай яктан танытырга өлгерделәр. Өлкәннәр һәм инвалидлар интернат–йортында “Яшьлекне искә төшерик” дигән акция кысаларында театральләштерелгән тамаша күрсәттеләр. “Өмет чыганагы” мөмкинлекләре чикләнгән балаларны тернәкләндерү үзәгендә дә аларны балалар бик яраттылар. Җиңү бәйрәме алдыннан волонтерлар, “Чиста ишегалды” акциясе оештырып, сугыш һәм хезмәт ветераны Шамил Вәлиевка булыштылар. Үзәк стадионда үткәрелгән “Безнекеләрне бел” акциясе яшьләрне ирекле хәрәкәткә тартуга юнәлдерелгән иде. Киләчәктә дә волонтерларның планнары зурдан. Изгелек эшләүнең чиге юк. Ә волонтерлар эшенең төп нигезе — шәфкатьлелек.