Бәйрәмдә дә эшлиләр

Бәйрәмдә дә эшлиләр
Бәйрәм итәргә кем генә яратмый икән? Җырлыйсың, биисең, көндәлек мәшәкатьләреңне беразга гына булса да онытып торасың. Аеруча Сабантуйлар бездә гөрләп уза. Халык игътибарына нинди генә уеннар тәкъдим ителми. Тамаша көне буе бара. Рәхим ит, рәхәтләнеп күңел ач. Әмма без ял иткәндә кайбер һөнәр ияләре эш урынында була.
Алар безнең тынычлыгыбыз, сәламәтлегебезне саклый, шулай матур ял итәргә мөмкинлек тудыра. Сүз полиция, медицина, янгын часте хезмәткәрләре турында бара. Алар күзлегеннән чыгып фикер йөрткәндә быелгы Сабантуйлар ничек үткән?
Марат Фәрхуллин — район эчке эшләр бүлегенең штаб җитәкчесе:
— Сабантуйлар вакытында график буенча һәр авылга икешәр кеше тәртип сагына куелды. Алар бәйрәм башланганнан алып бөтен кеше таралганчыга кадәр сакта булдылар, соңыннан бәйрәм тәмамлануы турында дежур частька хәбәр иттеләр. Арчада, Сикертән, Яңа Кенәр, Үрнәк, Шушмабаш Сабантуйларында да һәр хезмәткәр көне буе үзенә билгеләнгән урында дежурда торды, җәмәгать тәртибен саклады. Бер генә Сабантуйда да күңелсез хәлләр булмады.
Искәндәр Юзаев — 107 номерлы Арча янгын сүндерү часте җитәкчесе урынбасары:
— Сабантуйлар вакытында көчәйтелгән хезмәт режимы игълан ителде. Ирекле янгын дружиналарының көчәйтелгән наряды сакта торды. Янгын частеның Сеҗе, Яңа Кенәр, Үрнәктәге аерым постлары хезмәткәр-ләренә үзләренә караган территорияләр өчен җаваплылык йөкләнде. Кыскасы, бу көннәрдә Арча үзәк хастаханәсе, район эчке эшләр бүлеге, янгын частеннан 166 кеше, 31 техника кизү торды. Сабантуй бәйрәмнәре тыныч үтте.
Шулай да бу көннәрдә күңелне борчыган хәлләр булып алды. 9 июньдә кичке алтылар тирәсендә Арча станциясенең Тукай урамында шәхси йортта янгын чыкты. Сәбәбе — саксызлык, исерек килеш тәмәке тарту. Йорт тулысынча янып бетте, бер кеше зыян күрде, хастаханәгә озатылды. Янгын сүндерүчеләрнең вакытында килеп җитүе нәтиҗәсендә ут күрше–тирәләргә таралырга өлгермәде.
10 июньдә Штерәдә идарәне югалтып, “Хундай–Элантра” машинасы торак йортка килеп керә. Ике кеше зыян күрә, берсе хастаханәдә.
13 июньдә Малмыж—Казан юлының 67 километрында “ВАЗ–2115” һәм “ГАЗель” машиналары бәрелешә, пассажир хатын–кыз зыян күрә, хастаханәгә озатыла.
Ринат Хәстиев — медицина бүлеге буенча баш табиб урынбасары вазифаларын башкаручы, йөрәк–кан тамырлары үзәге җитәкчесе:
— Арча үзәк хастаханәсе, Яңа Кенәр участок хастаханәсе, фельдшер– акушерлык пунктлары табиблары һәм фельдшерлары, бәйрәм чорында беренче ярдәм күрсәтергә әзер булып, халык сәламәтлеге сагында торды. Өч көндә ашыгыч медицина ярдәме күрсәтү хезмәте Арча буенча 60 тапкыр урыннарга чыкты, район буенча (нигездә фельдшерлар) 90 кешегә медицина ярдәме күрсәтелде. Арча үзәк хастаханәсенең кабул итү пунктына 115 кеше мөрәҗәгать итте. 12 очрак инфаркт һәм инсульт белән. Шушы көннәрдә 4 операция ясалды.
Гөлсинә ЗӘКИЕВА