Бер атнага — “Азимут”кА

Бер атнага — “Азимут”кА
Узган атнада Түбән Мәтәскә урта гомуми белем мәктәбе базасында бер атналык “Азимут” палаткалы туристлык лагере ачылды.
Моңарчы Лесхоз мәктәбе базасында уза торган мондый рухтагы лагерь Түбән Мәтәскә мәктәбендә беренче тапкыр үткәрелә. Мо-нысы соңгысы булмас, иншалла. Район мәгариф идарәсе җитәкчесе Р.Бәдриева әйтүенчә, республикадан бирелгән квота буенча оештырылып, балаларга туристлыкның күп төрен өйрәтүгә нигезләнгән.
Түбән Мәтәскә мәктәбе укучылары туризм белән ныклап биш еллар элек шөгыльләнә башлаган. Шул еллар эчендә инде шактый уңышларга да ирешелгән, район күләмендә узган ярышларда беренче–икенчелекне бирмиләр, республика ярышларыннан да икенче урын алып кайтканнары бар.
Палаткалы–туристлык лагереның гадәти лагерьлардан аермасы шунда: балаларның ялы, вакытларының күп өлеше шөгыльләнүләргә корылган булуда. “Азимут”ка йөрүче балаларның да көндәлек режимнарында туризмга күп вакыт бирелә. Шулай ук төрле җирләргә: Казанга экскурсиягә, Арча педагогика көллиятенең туризм базасына һәм Балыкчы авылына җәяүле сәяхәтләргә дә вакытлары бүленгән. Ә лагерьның көннәре бик аз: бер атна эчендә планлаштырылган бар эшкә дә өлгерергә кирәк.
Азимутлыларның лагерь тормышыннан канәгать булуларын куанычтан балкыган йөзләре әйтеп тора. Балаларга уңай шартлар тудырып, ялларының күңелле үтүендә төп йогынты ясаучы, шатлыкларын уртаклашучы кешеләре дә гел яннарында: лагерь хуҗасыннан тыш берничә тәрбияче, пешекчеләр һ.б. әлеге санаулы көннәрнең балалар күңелендә онытылмаслык якты эз калдырылуы өчен тырыша. Төннәрен дә палаткалардагы балаларның йокылары сагында тәрбиячеләре белән бергә район эчке эшләр бүлегенең участок инспекторы тора.
Тик, санаулы көннәр тиз уза. Флаг күтәрелеп, тантаналы шартларда мәктәп яны лагере балалар бүләк иткән җыр–биюләр белән әле генә ачылган кебек иде, инде ахыргы көннәре дә җитә. Балалар күңеле тулы якты хис–кичерешләр, хыяллар, өметләр... Һәр баланың өмет–хыяллары аерым булса да, бу очракта барысыныкы да бертөсле: их, киләсе елларга да шушындый лагерь оешып, без тагын йөри алсак иде...
Розалия ЗИННӘТОВА