Дүрт хуҗалык сенаж сала, калганнар уйда

Дүрт хуҗалык сенаж сала, калганнар уйда
Татарстан Республикасы Премьер–министры урынбасары, авыл хуҗалыгы һәм азык–төлек министры Марат Әхмәтов видеоконференция режимында азык әзерләү мәсьәләләренә багышланган киңәшмә үткәрде.
Республикада азык культуралары 1 млн. гектар чамасы мәйдан били, шуның эченнән кукуруз — 208, берьеллык үләннәр һәм азык катнашмалары –292, күпьеллык үләннәр – 497 мең гектар. “Без шушы мәйданнардан 700 мең тонна печән, 2,8әр млн. тонна сенаж һәм силос әзерләүне планлаштырабыз. Азык берәмлегенә күчергәндә 2,1 млн. тонна, ягъни бер шартлы терлеккә 30 центнер азык берәмлеге”, — диде министр.
Быел үсемлекләр үсеш фазасын тиз уза. “Без үз практикабызда уҗым культураларының майның 20ләрендә серкә очырганын күргәнебез юк иде әле, ә быел әнә шулай булды”, — диде Марат Әхмәтов.
Терлекчелектә азык сыйфаты хәлиткеч фактор булып кала. Районнарда ваемсызларга тынгылык бирмәү өчен сыйфат комиссияләре төзергә, ә хуҗалыкларда җаваплы кешеләр билгеләргә. Яхшысын да, яманын да массакүләм матбугат чараларында киң яктыртырга.
Министр шәхси хуҗалыкларны азык белән тәэмин итү мәсьәләсенә дә тукталды. Аның күпмедер өлешен хуҗалыклар бирә, шулай ук элеккеге еллардагы кебек халыкның үзен дә тупларга кирәк. Масса бар, әмма активлык сизелми.
Күпьеллык үләннәрнең беренче катын уруны 6 июльгә кадәр төгәлләргә. Җәйнең 1 көне кышның 5 көнен туйдырырга тиеш, шуңа күрә вакытны әрәм итмәскә.
Марат Әхмәтов соңгы вакытта урнашкан һава торышының сыйфатлы печән әзерләү өчен бик уңай булмавын искәртте. Хәзерге вакытта иң әйбәте — сенаж салу. Масса 45–55 процент дымлылыкта булырга тиеш. Тәүлеккә кимендә 300 тонна салырга, консервантлар кулланырга, яхшылап тыгызларга, пленка белән капларга. Траншеяларга салынган сенаж, силос әйбәтрәк саклана.
Киңәшмәне муниципаль район башлыгы Алмас Назиров дәвам итте. Ул күтәрелгән мәсьәләләрнең мөһимлеген ассызыклады. Хәзер бар көчне терлек азыгы әзерләүгә тупларга. Дару үләннәре әзерләү буенча нәтиҗәле эш оештырырга.
Район башлыгы җитәкчеләр алдына конкрет бурычлар куйды, җитәкченең читтән күзәтеп йөрүче түгеллеген искәртте.
Район хуҗалыкларында 19 июньгә 22660 гектардагы күпьеллык үләннәрнең 11109 гектары урылды. Барысы 8986 тонна печән, 469 тонна витаминлы үлән әзерләнде, 9250 тонна сенаж салынды. Бер шартлы терлеккә 2,22 центнер азык берәмлеге тупланды. “Кырлай” ширкәтендә — 5,7, “Курса МТСы”нда, “Игенче”дә 4,6 центнер. “Аю”да — 0,87, “Вамин–Мәрҗани”дә 0,23 центнер гына.
“Ак Барс–агро” , “Кырлай”, “Курса МТСы”, “Игенче” ширкәтләрендә генә сенаж салалар, калганнар әле уйда.
Ильяс ФӘТТАХОВ