75нче мәчет

75нче мәчет
17 июньдә Арча шәһәрендә яңа мәчет ачу тантанасы булды. Анда муниципаль район башлыгы Алмас Назиров, Татарстан Республикасы Диния нәзарәте рәисе, мөфти Илдус хәзрәт Фәиз, республиканың баш казые Җәлил хәзрәт Фазлыев катнашты.
— Моның кадәр сандагы мәчетләр башка бер районда да юк, — диде тантананы алып баручы Җәлил хәзрәт. — Әле тагын төзелеп килүче мәчетләр шактый. Район башлыгы Алмас Әминович башка мәсьәләләр белән бергә динне үстерүгә дә зур игътибар бирә. Аллаһның рәхмәте яусын аңа.
Муниципаль район башлыгы Алмас Назиров күп санлы кунакларны әлеге тарихи вакыйга белән тәбрик итте.
— Арчаның бу өлешенә мәчет бик кирәк иде, — диде ул. — Югары Пошалым кешесе Равил әфәнде Бәдегытдинов, безгә бернинди проблема ясамыйча, менә шундый мәһабәт дин йортын, изге йортны халыкка бүләк итә. Аңа, туганнарына, әти–әнисенә, башка булышучыларга район халкы исеменнән зур рәхмәт. Мәчетнең ишекләре гел ачык булсын, ул һәрвакыт иман нуры чәчеп торсын.
Район башлыгы мәчетләр төзелү дәвам итүен әйтеп үтте. Халык, аерым кешеләр булышлыгы белән шәһәрнең көнбатыш өлешендә яңа гыйбадәт йорты төзелеп бетеп килә. Аны төзүгә өлеш керткән һәркемгә район башлыгы зур рәхмәт әйтте. Шул ук вакытта мәчет акчасын үзләштерәләр дип, имеш–мимеш таратырга маташучылар да бар. Монысын инде болганчык суда балык тотып булмасмы дип йөрүчеләр генә эшли ала.
Татарстан Республикасы Диния нәзарәте рәисе, мөфти Илдус Фәиз үзенең чыгышында Арча ягының элек–электән мәгърифәтчеләре, танылган дин әһелләре белән билгеле булуын әйтте. Мәчет төзегәндә бер кирпеч салсаң, әҗер савабы шул кирпеч зурлыгында булыр, ә мәчет салган кешегә Аллаһы Тәгалә җәннәттә йорт салырмын, дигән.
— Мәчетләребез белән горурланабыз, — диде ул. — Аллага шөкер, аларның саны арта, инде кешеләр күңелләренә дә мәчетләр салсак иде.
Равил Бәдегытдиновның апасы Фәүзия ханым, Әлфия абыстай, Хәлим хәзрәт күңелләрендәге шатлык хисләре белән уртаклаштылар.
Район башлыгы Алмас Назиров, Илдус хәзрәт Фәиз, Җәлил хәзрәт Фазлыев ал тасманы кискәннән соң күп санлы кунаклар изге йортка аяк бастылар.
— Эче дә карап туймаслык, күңел җылысы биреп, зәвык белән эшләнгән, — диде Алмас Әминович. — Икенче катта мәдрәсә булуы да әйбәт. Халык бу вакыйганы бик көтеп алган иде, рәхмәттән башка сүз юк.
Ильяс ФӘТТАХОВ