Бәйрәмгә ямь өстәделәр

Бәйрәмгә ямь өстәделәр
Татарстан Республикасы Президенты Рөстәм Миңнеханов 23 июньдә Казан шәһәренең Тынычлык бистәсендә үткән Сабантуйда ясаган чыгышында кунакларга республика тормышы белән таныштыру мөмкинлеге тудырган өчен районнарга аерым рәхмәт әйтте. Алар арасында Арча районы да бар.
Казан Сабантуенда арчалылар йортын эзләп йөрисе дә юк — капкадан керүгә иң беренче булыр ул. Алфавитта алда булганы өчен түгел, матур эшләре, хезмәттәге уңышлары, бәйрәмнәрне дә матур итеп оештыра белгәннәре өчен күрсәтелгән хөрмәт бу. Узган ел Россия Федерациясе Президенты Дмитрий Медведев та бик ошатып, озаклап тукталып, рәхмәт әйтеп киткән иде бу йорттан.
Быел да Арча йорты ерактан ук игътибарны җәлеп итеп, балкып, үзенә тартып тора иде. Мәйданга килүчеләрнең берсе дә аның янында тукталмый калмагандыр. Иң алда урнашкан сәхнәдә районыбыз талантлары, күңелләрне җилкендереп, матур җырларын, көйләрен яңгырата, аларны биючеләр, башка осталар алыштыра. Кунаклар да түзми, сәхнәгә менеп тыпырдый башлый, кечкенә балалардан алып әби–бабайларга кадәр бии.
Яңа Чүриле авылында яшәүче Ильяс Халитов мондый чараларда аеруча популяр, аның тирәсендә кеше өзелми, сорау-ларга җавап биреп кенә өлгер. Ә ул иренми, җайлап, тәмләп игътибарны иң күп җәлеп иткән тавис кошына ничә яшь, аның ниләр ашавы, нинди сыйфатларга ия булуы турында сөйли. Буралап ясалган оясы алдында бөтерелеп йөргән, чуклар белән бизәлгән нәни көчеге дә игътибар үзәгендә, аның белән фотога төшәләр, бала–чага өненә дә үрмәләп кереп чыга, ә ул моңа шат кына.
Янәшәдә — безнең баш умартачыбыз Ядкәр Мөхәммәдиев. Бөтен эш кораллары, бизәкле, манаралы умарталары белән. Аның янында да тукталмый үтмиләр, былтыр Медведев белән дә кызыклы әңгәмә корганнар иде.
Шыңгырдап торган чыршы бүрәнәләрдән салынган мунчаны да бик яраттылар, чират торып эченә кереп карап чыктылар. Бәясе белән кызыксынучылар да бар иде. “Узган ел шушыннан алган мунча миллеге кыш буена җитте, быел да булмасмы?” — ди бер ханым.
Курса–Почмактан Хәлил Хәсәнов, Түбән Курсадан Җиһангир Галимҗанов һәр бәйрәмдә матур итеп бизәлгән җигүле атлары белән күпме шатлык бүләк итәләр. “Курса МТСы”, “Ак Барс–агро”, “Татарстан” хуҗалыклары да бәйрәмне матурлауга үз өлешләрен керткән. Шулар арасында урман хуҗалыгы исемлекнең иң башында. Искиткеч капка–койма, баллы кәрәз белән чагыштырырлык бүрәнәләрдән салынган йорт, мунча, келәт — шундагы осталар эше. Директорлары Шамил Хәйруллин үзе дә шунда, меңләгән кешене сөендерә алу үзе зур бәхет.
Татарстан Республикасы Президенты Рөстәм Миңнеханов та, арчалылар хезмәтен ошатып, рәхмәт әйтеп китте.
Әлеге зур бәя артында бик күпләрнең тырыш хезмәте ята. Иске Чүриле авылыннан агач әйберләр ясау остасы Җәлил Вилданов, “Казан арты” тарих–этнография музее, Укучылар сарае, мәдәният, мәгариф идарәләре коллективлары, һәрвакыт ипи–тоз, якты йөз белән каршы алып, тәмле ризыклар белән сыйлаучы Нурияздан Әхмәдуллинның да өлешләре аз түгел анда.
Муниципаль район башлыгы Алмас Назиров Казан халкы өчен шундый матур бәйрәм оештыруда катнашкан һәр кешегә рәхмәт әйтте, һәркайсына сәламәтлек, уңышлар теләде.
Ильяс ФӘТТАХОВ