Яхшы юллар һәр авылга киләчәк

Яхшы юллар һәр авылга киләчәк
Муниципаль район башлыгы Алмас Назиров 22 июньдә район хуҗалыкларында булды. Ул терлек азыгы әзерләүнең барышы, юл төзелеше, терлекчелек һәм башка мәсьәләләр белән кызыксынды.
“Ак Барс–агро” ширкәте җитәкчесе Шәйдулла Сәлахов (рәсемдә) район башлыгына хуҗалыкта эшләрнең барышы турында сөйләде. Хуҗалыкта терлек азыгы әзерләүгә зур игътибар бирелә. Сенаж салу, печән, витаминлы үләннәр, яфрак азык әзерләү технология таләпләренә туры китереп башкарыла.
— Менә бу чокыр 40 метр озынлыкта, 9 метр киңлектә, — диде хуҗалык җитәкчесе. — Сенаж бик яхшы саклана, алганда да колбаса кискән кебек итеп алып баралар, әрәм итүгә юл куелмый.
Салына торган яшел массаның тиешле дымлылыкта булуын, яхшылап таптатылуын ныклы контрольдә тоталар. Эш тәүлек буе тукталмый, 2–3 көндә чокырны тутырып та куялар.
Сеҗе, Ташкич авылларында яшәүчеләрне быел шатлыклы вакыйга көтә — асфальт юллы булачак алар. Яңа юл Сеҗе урамнарыннан үтеп, Ташкичкә тоташачак. Сеҗедә яңа күпер салына. Район башлыгы биредә юл төзелешенең барышыннан канәгать калды. Хуҗалык җитәкчесе Шәйдулла Сәлахов: “Пычракларда сөт машиналары үтә алмый иде, бу бәладән дә котылабыз”, — дип шатлана.
— Быел районга юл төзелешенә акча узган елга караганда кимрәк бирелсә дә, эш күләме шактый булачак, — диде Алмас Әминович. — Аеруча сөендергәне — иң читтә урнашкан Сәрдәбаш, Югары Оры авылларына асфальт юл киләчәк, Югары Оры яңа күперле булачак.
Район башлыгы Сөрде — Югары Оры юлында да булды. Биредәге эш темпы аны канәгатьләндереп бетермәде.
“Северный” хуҗалыгында Алмас Әминович игеннәрнең торышы белән дә кызыксынды. Хуҗалык җитәкчесе Рөстәм Хәйруллин арышның яңгырлардан соң алдырып китүен әйтте, аңа кадәр уңыш язмышы өчен борчылу туган иде. Соңгы вакытта урнашкан коры һава, төннәрнең салкын булуы сабан культуралары үсешенә тоткарлык ясый. Шифалы яңгырлар бик кирәк.
Район башлыгы Шекә, Ишнарат авылларында булды. Шекәгә быел асфальт юл килеп җитә, монда эш әйбәт оештырылган. Ишнарат авылы асфальт юллы булган иде инде. Бу юлның кырыйларын ясап бетерәсе бар.
Быел Бирәзәбаш авылына да асфальт юл киләчәк. Әле өметтә кайбер башка авыллар да бар, алары — мөмкинлеккә карап. Әкренләп районның һәр авылына асфальт юл килергә тиеш.