Яңа йолдызлар кабынды

Яңа йолдызлар кабынды
25 июньдә районыбызның 11 сыйныфны тәмамлаган 341 укучысы урта белем алу турындагы аттестатка ия булды.
Лесхоз мәктәбеннән Ришат Нуриев, Ашытбаштан Эльвира Хөсәенова, Арча 1нче урта мәктәбеннән Диләрә Хәстиева, Арча 2нче урта мәктәбеннән Айсылу Сабирова өчен бу көн икеләтә бәйрәм рухы алды: аларга Арча үзәк паркындагы Дан аллеясында йолдызлар ачылды. Мондый традиция районыбызда 2009 елдан тормышка ашырылып килә һәм үзләренең интеллектуаль, иҗтимагый һәм физик хезмәтләре, белемнәре белән районыбызны республика һәм Россиягә танытуда өлешләрен керткән укучылар арасыннан иң яхшылары хөрмәтенә яңа йолдызлар балкый.
Быелгы “йолдызлылар” да район һәм мәктәп тормышында активлык күрсәткән, республика һәм Россия күләмендәге олимпиадаларда, фәнни чараларда, “Авылның иң талантлы 100 баласы” акциясендә, спортта җиңүчеләр. Әлеге истәлекле көн уңаеннан аларны район башкарма комитеты җитәкчесе урынбасары Н.Мифтахетдинова, район мәгариф идарәсе җитәкчесе Р.Бәдриева, район яшьләр эшләре, спорт һәм туризм бүлеге җитәкчесе З.Сәгыйтов, “Бердәм Россия” сәяси партиясе җирле бүлекчәсе вәкилләре котлап, изге теләкләрен ирештерде. Укучылар да уңышларга ирешүдә ярдәм иткән якын кешеләре — әти–әниләренә, укытучыларына, дусларына, сыйныфташларына рәхмәт сүзләре әйтте.
Алда белем алуга, яңа һөнәр үзләштерүгә корылган тормыш этабы көтә. Тормыш юллары яңадан–яңа йолдызлар белән тулы, сикәлтәсез, нык булсын.
Розалия САФИНА