ЮХИДИгә 76 яшь

ЮХИДИгә 76 яшь
Алар кешеләрнең юлларда хәвеф–хәтәрсез, имин, сәламәт йөрүләре өчен бар көчләрен куеп эшли. Көн дими, төн дими, тәүлекнең теләсә кайсы вакытында юлларда хәвеф–хәтәргә юлыгучыларга ярдәмгә ашыгырга әзерләр. Бәйрәм көннәрендә аеруча җиң сызганып эшләргә туры килә үзләренә.
Шушы көннәрдә Россия Эчке эшләр министрлыгының Арча районы буенча ЮХИДИ бүлекчәсе хезмәткәрләре һөнәри бәйрәмнәрен билгеләп үтә. Биредә хезмәтләренә чын күңелдән бирелгән, тугрылыклы хезмәткәрләр көч куя. Коллектив белән 19 ел полиция подполковнигы Габделхак Габделфәрт улы Касыймов (рәсемдә) җитәкчелек итә. Һөнәри бәйрәмнәре уңаеннан без аның белән әңгәмә корып, башкарган эшләренең нәтиҗәсе, план- нары турында сөйләштек. “3 июльдә ДАИ–ЮХИДИ хезмәте оешуга 76 ел булды. Шул уңайдан дәүләт автомобиль инспекциясенең Арча бүлекчәсендә эшләгән хез-мәткәрләрне, ветераннарны һөнәри бәйрәмебез белән тәбрик итәм. Авыр, җаваплы, мактаулы да булган хезмәтләрендә тынычлык, исән–имин яшәүләрен теләп калам. ЮХИДИ хезмәткәрләренең эше җиңел түгел, күп вакыт сәламәтлегебезне, тормышыбызны да куркыныч астына куярга туры килә. Эсседә, көчле яңгыр–бураннарда да без постта торабыз. Хезмәткәрләребезнең белемнәре, тәҗрибәле, җаваплы булулары авырлыкларны җиңәргә ярдәм итә. Бүгенге көндә безнең бүлекчәдә һөнәри яктан булдыклы 12 хезмәткәр эшли. Озак еллар хезмәт итүче хезмәткәрләребез: өлкән инспектор Рәдис Гарифуллин, пропаганда буенча инспектор Альберт Сабиров, транспорт чараларын исәпкә алу буенча дәүләт инспекторы Илшат Сәгыйтов, имтихан эшләре буенча дәүләт инспекторы Нияз Бариев хезмәтләрен намус белән башкаралар. Еш кына ветераннарыбыз Гаяз Садриев, Равил Галимов, Наил Галимуллин белән киңәшләшеп эшлибез. Алар да безне онытып бетерми, гел килеп киңәшләрен бирә, кимчелекләребезне тәнкыйтьли, уңышларыбызга куанып яши.
Хезмәтебезгә бәя биргәндә юлларда транспорт һәлакәтләренең булмавы мөһим роль уйный. Быелгы бәйрәмне без әйбәт күрсәткечләр белән каршы алабыз. Авария-ләр, һәлак булучылар, имгәнүчеләр саны да шактый кимеде. Киләчәктә дә аварияләр санын киметү максатында эш алып барылачак.
Халыкка мөрәҗәгать итеп шуны әйтәсем килә: юлда йөрүчеләр үзләренең һәм башка кешеләрнең тормышларына, сәламәтлекләренә җаваплы карасыннар иде. Юлга чыкканда якыннары, әти–әниләре, балалары исерек кешене руль артына утыртмас өчен барысын да эшләргә, нинди дә булса чара күрергә тиеш. Юлда тизлекне арттырмау, бу турыда янында утырып барган кешенең кисәтүе кирәк. Руль артындагылар юл йөрү кагыйдәләренә буйсынсалар, юлларда хәвеф–хәтәрләр, һәлакәтләр булмас иде. Һәммәбезгә исән–имин йөрергә, сау–сәламәт булып яшәргә язсын”.
Розалия ЗИННӘТОВА