Бәхетле нигезләр булсын

Бәхетле нигезләр булсын
29 июньдә шәһәребездә бер көндә өч шатлыклы вакыйга булды. Беренче тантана — Пушкин урамында, биредә табигатьнең матур почмагында төзелгән мәһабәт йорттан унике ветеран бөтен уңайлыклары булган фатирлар алды.
Тантанага ветераннар белән бергә балалары, туганнары, якыннары килгән иде.
— Без бүген барыбыз да шатлыклы мизгелләр кичерәбез, — диде муниципаль район башлыгы Алмас Назиров. — Сез шатланганга без дә сөенәбез. Дәүләтебез ил азатлыгы өчен үзләреннән өлеш керткән кешеләрне шулай хөрмәтләп бик игелекле эш башкарды. Безнең районда 697 кеше исемлеккә кертелгән иде, шулардан 12 ветеран гына аласы калды. Аларга дигән фатирлар да төзелеп бетеп килә. 61 ветеран гына фатирларны читтән алды, калганнары бар да Арчада.
Алмас Әминович социаль ипотека буенча да 400гә якын кешенең фатирлы булуын билгеләп үтте. Әлеге программалар буенча төзелгән йортлар шәһәребезнең йөзен үзгәртте.
Татарстан Республикасы Президенты каршындагы Торак фонды җитәкчесе урынбасары Марат Надршин, ветераннарны шатлыклы вакыйга белән котлаганнан соң, Арча районының җан башына торак төзү буенча республикада беренче урында булуын әйтте. Социаль ипотека буенча фатирлар төзү бары тик Татарстанда гына тормышка ашырыла, башка регионнар килеп, безнең тәҗрибәне өйрәнә.
Ветераннар исеменнән рәхмәт сүзләре әйтүче Мөнирә Идиятова өчен аеруча истәлекле көннәр бу. Муниципаль район башлыгы Алмас Назиров аңа 90 яшь тулу уңаеннан Россия Президенты Владимир Путинның Котлау хатын, бүләк һәм яңа фатирга ачкыч тапшырды.
Муниципаль район башлыгы Алмас Назиров, ТР Президенты каршындагы Торак фонды җитәкчесе урынбасары Марат Надршин ал тасманы кискәннән соң ветераннар белән яңа фатирларга уздылар, аларның эшләнешенә, уңайлыкларга югары бәя бирделәр. Әлеге йортны Зиннур Гарифуллин җитәкләгән “Арча МСОсы” ширкәте төзеде.
Тантананың икенчесе Зәйнуллин урамындагы 13а йорты янында булды. Әлеге йортны да “Арча МСОсы” ширкәте төзегән. Муниципаль район башлыгы Алмас Назиров, ТР Президенты каршындагы Торак фонды җитәкчесе урынбасары Марат Надршин социаль ипотека буенча шарт-ларны үтәүчеләргә һәм алты ятим балага яңа фатир ачкычлары тапшырдылар.
Бу көнне шулай ук Мәктәп урамындагы 54нче йорт та (Рафаэль Муллагалиев җитәкчелегендәге “Арча КСМы” ширкәте төзегән) ишекләрен ачты. Тантанада муниципаль район башлыгы Алмас Назиров, ТР Президенты каршындагы Торак фонды җитәкчесе урынбасары Марат Надршин катнашты. Әлеге мәһабәт йорттан фатир алучы бәхетлеләр арасында социаль ипотека буенча чиратлары җитүчеләр, Бөек Ватан сугышы ветераны, сугышчан хәрәкәтләрдә катнашучы бар.
Ильяс ФӘТТАХОВ