Арча тәрәзәләре шәп

Арча тәрәзәләре шәп
Ренат Шиһабиев заманында Арча балык хуҗалыгын Россия күләмендә алдынгы урыннарга чыгарган кеше. Юл идарәсендә баш инженерлыктан килгән иде ул анда.
Яңа җитәкче көчле коллектив туплый алды, тәртип яхшырды, күрсәткечләр алга китте. Яңа сезон алдыннан ел саен хезмәт хакларын арт-тыру традициягә кергән иде.
Берәү булса бәлки яңа хуҗалар белән дә яраклашып яшәр иде, әмма Ренат Миңһаҗ улының характеры андый түгел, бу очракта да ул урамга чыгып китүне өстен күрде. “Без бит советча тәрбияләнгән кешеләр идек, — ди ул. — Балык хуҗалыгыннан киткәндә утырып йөрергә “Жигули” машинасы да юк иде”.
Бервакыт крахмал тавыннан җәяүләп төшеп барганда бер танышы очрый. Хәл–әхвәлне сорашканнан соң: “Аптырап йөрмә, “ГАЗель” машинасы ал, кибет ачып җибәр”, — ди. Шулай эшли дә, кредитлар рәсмиләштереп, яңа “ГАЗель” ала, кибет ача, үзе рульгә утырып ел ярым Мәскәүдән товар ташый.
Тора–бара пластик тәрә-зәләр җитештерә башлау фикере туа анда. “Италия белгечләренең 40 процент җылылыкның тәрәзә аша югалуын исәпләп чыгарулары турында укыган идем, — ди ул. — Аларда вакуумлы пластик тәрәзәләр ясыйлар икән. Ә безнең шартлар өчен иң әйбәте — герметиклаштыру ысулы белән ясау”.
Сигез ел файдаланылмый яткан бинаны биш ай ремонт-лаганнан соң (“бик күп ак-чалар түгелде”), инде эшли башлыйбыз гына дигәндә, кризис килеп чыга. Бу чорда йокысыз төннәре аз булмагандыр: күпме кредит түлисе бар, ә эшнең рәте–чираты юк. “Танышлар танымаганга сабышып үтә, мыек астыннан елмаеп йөрүчеләр дә булды”, — дип искә ала ул көннәрне.
Тырышкан табар, ташка кадак кагар дип, нәкъ менә Ренат Шиһабиев кебекләр турында әйтәләрдер. Бүген ул җитәкләгән предприятие дөнья стандартларына туры килә торган продукция җитештерә. Җиһазлар, җайланмалар Италиядән, Германиядән, Төркиядән кайтарылган. Эш конвейер рәвешендә бара, бер баштан кереп киткән пыяла икенче баштан әзер тәрәзә булып чыга. Кул хезмәте бик аз дәрәҗәдә. 6 миллион сумга төшкән 9 станокның берсе зур кисәк пыяланы җайлап кына махсус өстәлгә куя, аннан соңгысы тиешле үлчәмнәргә кисә, юа торганы да бар. 40лап кешенең һәркайсы үз участогында мәшгуль. Монда төгәллек микроннар белән исәпләнә. Заказчыдан бернинди дәгъва булырга тиеш түгел. Һәм бу шулай да. Иң күп клиентлар Арча районыннан. Әтнә, Саба, Теләче, Биектау, Казаннан да киләләр. Күрше күршегә, танышы танышына Арча тәрәзәләрен мактап сөйли, шуннан юллар Арчага “АрскПласт”ка илтә. Үзләре барып үлчи, илтеп куя.
Арча тәрәзәләренә сорау арта бара. Былтыр майда 497 кв. метр тәрәзә эшләсәләр, быел ул 1073 кв. метрга җиткән. Июньдә дә үсеш 59 процент.
“АрскПласт” ширкәте эшчәнлегенә муниципаль район башлыгы Алмас Назиров та югары бәя бирде.
— Юкны бар итеп, Европа стандартлары югарылыгында продукция чыгара алу дәрәҗәсенә күтәрелү өчен гаять зур тырышлык кирәк, — диде ул. — Эш урыннары булдырып, алар өчен әйбәт шартлар тудырып, шәһәребезнең ныклыгын арттыруга өлеш кертүегез өчен рәхмәт.
Ренат Шиһабиев район башлыгына предприятиене үстерү буенча киләчәккә планнары турында да сөйләде. Моңарчы хезмәт хакын сәгатьләп түләсәләр, хәзер продукция күләменә карап исәпли башлаганнар. Һәм ул үсеш ягында.
Җитәкче үзенең гаиләсен ышанычлы таянычы дип исәпли. Хәләл җефете Рәшидә, уллары Булат белән Айрат аның планнарын тормышка ашыруда төп терәк булып торалар.
Ильяс ФӘТТАХОВ