Кадетлар — “Шатлык”та

Кадетлар — “Шатлык”та
Беренче сменада ял итүчеләрне озату белән Шурабаштагы “Шатлык” лагере яңадан үз ишекләрен киң итеп ачты. Бу юлы ул район мәктәпләрендәге кадетлар сыйныфларында укучы 100 баланы кабул итте.
2 июльдә “Йолдызлар десанты” дип аталган икенче сменаны ачу тантанасы булды. Анда район башкарма комитеты җитәкчесе урынбасары Надия Мифтахетдинова, район мәгариф идарәсе җитәкчесе Рина Бәдриева, ТР хәрби комиссариатының Арча һәм Әтнә районнары буенча бүлек җитәкчесе, подполковник Алмаз Борһанов, балигъ булмаганнар белән эшләү комиссия-се сәркатибе Миләүшә Гарифуллина, яшьләр эшләре, спорт һәм туризм бүлеге җи-тәкчесе Зиннур Сәгыйтов һәм башкалар катнашты.
“Йолдызлык”, “Кадетлар”, “Кока–Кола”, “Максимум”, “Солдатлар” взводлары (отрядлары) командирлары рапортыннан соң сүзне Алмаз Борһанов алды.
— “Йолдызлар десанты” кадетлар өчен оештырылды. Кадетлар — илебезнең патриотлары. Сез хәзер үк туган илебезне саклыйсыз. Сез нык әзерлекле булырга, хәрби дисциплинаны белергә тиеш. Хәрби әзерлек буенча дәресләр, күнегүләр дә үтәчәксез. Моның өчен без Арча мәктәпләренең иң яхшы, тәҗрибәле тормыш иминлеге нигезләре укытучыларын чакырдык, — диде ул.
Икенче мәктәптән Рәзих Камалов, Рамил Фазылов, 5нче гимназиядән Ленар Алиев, Фәнис Абдуллин, мәгариф идарәсе белгече Айнур Ахунов взводларга кураторлар итеп билгеләнсә, Арча педагогика көллияте студентлары Салават, Данис, Нияз, Динара, Рәзинә, Фәрзия, Ольга, Гөлшат, Алсу, Ләйсән вожатыйлар булачак. Ә өлкән вожатый — 5 курс студенткасы Рамилә Шәйхиева. “Йолдызлар десанты” профильле сменада ТРның атказанган физик культура хезмәткәре, РФнең физик культура һәм спорт отличнигы Фәрит Минхәеров катнаша.
— Без лагерьда көннәрегезне үзегезнең киләчәгегез өчен файдалы булырлык итеп үткәрергә тырышырбыз. Иң мөһиме — авыртмагыз, сау– сәламәт булыгыз, — диде Фәрит Фәтхиевич.
“Йолдызлар десанты”ндагылар өчен расписание бик “бай” эчтәлекле. Аларга ату, туризм, көрәш, медицина, стройда йөрү һәм башка хәрби әзерлек төрләре буенча күнекмәләр алу мөмкинлеге бар. Моннан тыш төрле музыкаль, күңел ачу чаралары, спорт уеннары, “Наркоконтроль сугышчысы” дигән сюжетлы–рольле уен, очрашулар һәм башка файдалы, кызыклы чаралар оештырылачак. Иң соңыннан кадетларны “Дуслык учагы” үз янына җыячак.
— Бу смена үзенчәлекле һәм ул балалар хәрәкәте тарихында беренче тапкыр оештырыла. Ул сезнең өчен рухи яктан этәргеч бер көч булсын. Чөнки сез бүгеннән үк, яшьтәшләрегездән аермалы буларак, туган илебез сагында торасыз. Лагерьдан физик һәм рухи яктан ныгып кайтуыгызны, хәрби хәзерлек буенча үзегезгә ки-рәкле кагыйдәләр һәм күнекмәләр үзләштерүегезне телим, — диде Надия Мифтахетдинова.
Лагерьны ачу тантанасыннан соң “Йолдызлар десанты” профильле сменада ял итүчеләр “Тугызынчы вал” диңгез сәяхәтенә “юл алдылар”. “Бердәм Россия” сәяси партиясенең Арча җирле бүлекчәсе башкарма комитеты җитәкчесе урынбасары Валентина Гаранина, Арчаның беренче мәктәбе укучылары Таһир Исмәгыйлев, Аделина Абдуллина, педагогика көллияте студенты Эдуард Прахов аларны чын мәгънәсендә лагерь дөньясына алып кереп киттеләр. Кадетлар уйнадылар, бәй–геләрдә катнаштылар, биеделәр, җырладылар. Бер–берсенә дә, лагерь тормышына да ияләшү өчен бу беренче һәм бик яхшы дәрес булды.
Гөлсинә ЗӘКИЕВА