Тәҗрибә уртаклашырга — Арчага

Тәҗрибә уртаклашырга — Арчага
Арчаның 1нче номерлы балалар бакчасы базасында “Бәләкәч” республика күләмендәге программаны тормышка ашыруда идеяләр, эзләнүләр, карарлар” темасына региональ фәнни–практик семинар узды.
Арча район мәгариф идарәсе, мәктәпкәчә белем бирү системасына яңарыш кертү буенча грант проектында катнашып, җиңүче булды һәм республиканың стажировкалау мәйданчыгындагы 50 база мәйданчыгы арасына керде. Җиңүче буларак, базасында гаилә бакчасы булган балалар бакчаларына 1әр миллион сум күләмендә акча бүлеп бирелде. Мәйданчыктагы һәр базаның үз юнәлеше бар һәм алар республика күләмендә семинарлар үткәреп, тәҗрибәләрен башкалар белән дә уртаклашырга тиеш. Әтнә, Теләче, Яр Чаллы, Әлмәт, Яшел Үзән, Казаннан Арча районына килүче белгечләр гаилә балалар бакчасы буенча тәҗрибә уртаклашты.
Семинарны район башкарма комитеты җи-тәкчесе урынбасары Н.Мифтахетдинова ачты, район мәгариф идарәсе җитәкчесе Р.Бәдриева, әйдәп баручы белгеч Д.Мусина райондагы гаилә балалар бакчаларының эшчәнлеге, уңай һәм тискәре яклары турында чыгыш ясады. Арча җирлегендә бүген 52 балалар бакчасы эшли һәм аларда 2000нән артык бала тәрбияләнә. Алар түбәндәге юнәлештә эш алып бара: үз балаларын тәрбияләүче күп балалы гаиләләр, үз балалары белән беррәттән башка гаилә балаларын кабул итү–че һәм педагог гаиләсендә тәрбияләнүче башка гаилә балалары.
Семинардагыларны Арчаның 1нче һәм 5нче номерлы балалар бакчасы мөдир-ләре Э.Абдуллина, Л.Шәйхетдинова әлеге бакчалар карамагындагы гаилә бакчалары белән таныштырып китте. Яшел Үзән районыннан килгән бакча мөдире И.Памурзина мәктәпкәчә яшьтәгеләр өчен балалар бакчаларында кыска вакытлы модель төркемнәр оештырылуы хакында үзләренең эш алымнары белән уртаклашты.
Гаилә бакчаларының өстенлекле яклары күп дип саный белгечләр: балалар саны аз булу сәбәпле һәрберсенә аерым игьтибар, җылы бүлмәләр, йорт, гаиләдәге шартлар һ.б. Семинарның пленар өлешеннән соң сыйныф бүлмәләрендә мастер–класста булучылар да моңа инанды. Күпләр андагы яңалыкларны, алымнарны үзләрендә куллану өчен тәҗрибә дә туплады.
Дәүләт автоном мәгариф учреждениесенең өстәмә һөнәри белем бирү буенча “Татарстан Республикасында мәгарифне үстерү институтының” мәгарифне үстерү программасы бүлеге мөдире, доцент Л.Иванова бәяләвенчә, Арча районындагы эш барышы югары дәрәҗәдә оешкан. “Мондый эш алымы сезнең районда абруе булган перспективалы модельләрнең берсе. Райондагы 6 бакча мәгариф институтының стажировкалау мәйданчыгында кадрлар мәйданчыгы булып тора. Тәрбиячеләр ай саен безгә семинар–укуларга килә”, — диде ул.
Розалия ЗИННӘТОВА