Амбарда да бөҗәк ашамасын

Амбарда да бөҗәк ашамасын
Игеннәрне урып–җыюга керешергә озак калмады. Комбайннар, ашлык чистарту техникасы белән бергә, яңа уңыш ашлыгы салыначак склад биналарын да тагын бер тапкыр күздән кичереп чыгарга кирәк.
Орлыклар турында аеруча кайгыртырга. Уңай һава торышы, ашлама, югары агротехника һәм яхшы сыйфатлы орлыклар — булачак уңышның нигезе. Үстерелгән, эшкәртелгән орлыкларны киләсе чәчүгә кадәр сыйфатын бозмый саклау бик мөһим.
“Россельхознадзор”ның Татарстан Республикасы буенча Идарәсенең орлык контроле бүлеге белгечләре хәзерге вакытта орлык складларының торышын тикшерә. Соңгы тикшерүләр нәтиҗәләреннән күренгәнчә, кайбер хуҗалыкларда әлеге мәсьәләгә тиешле игътибар бирелми. Амбарлар корткыч бөҗәкләрдән арындырылмаган урыннар да бар. Алар орлыкларга зур зыян салачак, киләсе ел уңышына куркыныч яный дигән сүз. Шуңа күрә әлеге хуҗалыкларның агрономнарын, җитәкчеләрен административ җаваплылыкка тартырга туры килде. Моның белән генә дә котыла алмыйлар — складларны билгеләнгән срокта корткычлардан арындырырга туры киләчәк.
Складларны тиешле хәлдә тота алмаган урыннарда явым–төшем тишек–ярыклардан эчкә үтеп керә, корткыч бөҗәкләр үрчү өчен уңай шартлар туа. Шулай ук кар, яңгыр эләккән орлык кызып бозыла.
Быел беренче яртыеллыкта безнең белгечләр шактый суммада штрафлар салдылар, язмача кисәтүләр җибәрделәр. Әмма күп җитешсезлекләрне төзәтеп булмый иде, чөнки сыйфатсыз, бозылган орлык инде чәчелгән.
Урып–җыюга ныклап керешкәнче склад һәм амбарларны тулысынча әзерләп бетерергә кирәк.
Рифкать ГАЛИМУЛЛИН,
“Россельхознадзор”ның ТР буенча Идарәсе дәүләт инспекторы