Янгыннарны кисәтик

Янгыннарны кисәтик
Игеннәрне урып-җыю авыл хуҗалыгы эшләренең иң җаваплысы һәм төгәлләүче бер этабы булып тора.
Уңышны вакытында җыеп алу гына мөһим түгел, ә аны урлаудан, бозылудан һәм янгыннан да сакларга кирәк. Иген басуында янгынга китерүче сәбәпләр түбәндәгеләр: комбайн яисә автомашинаның төтен торбасыннан чыккан очкын, двигатель коллекторына эләккән саламга ут кабу, техниканың механизмнарын дөрес көйләмәү нәтиҗәсендә очкын чыгу, электр чыбыкларындагы кыска ялганыш, саклагыч чаралары белән тәэмин ителмәгән кызган детальләргә коры салам яки үлән эләгү, карбюратордан ягулык агу һ.б. Бу һәм башка сәбәпләр нәтиҗәсендә янгын чыгуларны булдырмау өчен урып-җыюда катнашучы һәркем махсус хәзерлек үтә. Янгын техник минимумын үтәмәүчеләргә кыр эшләрендә катнашырга рөхсәт ителми.
Моннан тыш, урып-җыю комплексы әгъзалары эш башланыр алдыннан янгын куркынычсызлыгы буенча инструктаж үтәләр, аларга бәла-каза килгәндә кем нәрсә эшләргә тиешлеге аңлатыла. Шулай итеп, янгын чыкса, нәрсә эшләргә тиешлеген белеп тора.
Комбайннарны һәм машиналарны янгынга каршы җайланмалар белән җиһазларга кирәк. Двигательне кабызу һәм ягулык системаларын көйләү, механизмнарны майлау шарт. Смена дәвамында бер тапкыр машиналарны тузаннан һәм майдан чистарту мәҗбүри. Двигательнең төтен торбасын һәм очкын сүндергечләрне дә даими чистарту сорала. Комбайннарда саклагыч капкачлар урынына җилгә юнәлеш бирүче калканчыклар куллану яхшырак, чөнки бу коллекторны эш барышында тузаннан чистартырга һәм суыртырга мөмкинлек бирә.
Теземнәрне сукканда җыйгыч тешләре сынып, барабан капкачы эченә эләккән очракта, аны кичекмәстән чистартырга кирәк, чөнки бу янгыннарга китерергә мөмкин.
Комбайнның барлык узелларын, аеруча двигательне, көн саен кибәктән һәм тузаннан чистартып тору зарур. Ә ягулык бакларын двигательне сүндер-гәннән соң һәм кишәрлектән читтә тутырырга кирәк. Бу вакытта тәмәке тарту , ачык ут куллану тыела. Ягулык салу өчен чиләкләр кулланырга ярамый, һәм, билгеле, һәр механизаторда янгын сүндерү җайланмалары булырга, ул аларны куллана белергә тиеш: һәр комбайнда 2 янгын сүндергеч,1 кошма, 1 мичкә су, ком.
А.ШӘРӘФИЕВА,
янгынга каршы ирекле җәмгыять инструкторы.