Аларга наркополицейский булу ошый

Аларга наркополицейский булу ошый
“Шатлык” сәламәтләндерү лагеренда “Йолдызлы десант” хәрби–патриотик смена кысаларында, райондагы наркотикларга каршы комиссиянең Россиянең Татарстандагы наркотиклар әйләнеше контроле буенча федераль хезмәт Идарәсе белән берлектә оештырылган “Наркоконтроль сугышчысы” уены узды. “Шатлык” мәктәпләрнең кадет сыйныфларында укучыларны гына түгел, “куркыныч төркеме” балаларын да җыйды.
Лагерьга кунак булып район башкарма комитеты җитәкчесе урынбасары, үзе үк районның наркотикларга каршы көрәш комиссиясе рәисе урынбасары Н.Мифтахетдинова, республиканың җәйге ялларны оештыру буенча ведомствоара комиссиясе вәкиле И.Берхеев, наркотиклар әйләнеше контроле буенча федераль хезмәт Идарәсенең баш белгеч–эксперты М.Фирсова, Арча үзәк хастаханәсенең табиб–наркологы Р.Әхмәтҗанов, Арча эчке эшләр бүлегенең балигъ булмаганнар белән эшләү бүлеге җитәкчесе А.Хәбибуллина, “Бердәм Россия” сәяси партиясенең Арча җирле бүлекчәсе башкарма комитеты җитәкчесе урынбасары В.Гаранина килгән иде.
Уен башланганчы янгын часте, эчке эшләр бүлеге, медицина хезмәте вәкилләре тарафыннан балаларга мастер–класслар уздырылды. Балаларны аеруча кинолог хезмәте турында Арча эчке эшләр бүлеге кинологы И.Әсхәдуллинның сөйләве кызыксындырды. Алар күп кенә сорауларга җаваплар алуга да иреште.
Наркотиклар әйләнеше контроле буенча федераль хезмәт Идарәсе эксперт бүлекчәсе тарафыннан ел саен наркотик матдәләрнең яңа төрләре ачыклана. М.Фирсова наркотик куллануның хәтәр яклары турында сөйләде. Тик чыгышы тәмамланып өлгергәнче үк аны бүлдерделәр: телеграмма килгән! Баксаң, лагерьда куркыныч җинаятьчеләр качып ята икән, аларны тотып, зарарсызландырырга кирәк. Һәм бу эшләрне наркоконтроль сугышчылары булып балалар башкарырга тиеш.
Шулай итеп уен башланып китте. Һәр отрядка маршрут бите бирелде, анда язылган һәр этапта балаларны яңа биремнәр көтә. Шул этапларны уңышлы узган отрядларга наркотиклар яшерелгән һәм наркодилерның ниндирәк булуы, кайда урнашканлыгы турында күрсәтелгән билге бирелде. Каршылыклы полосаларны җиңеп, балалар наркотик бе-лән сәүдә итүчеләрне зарарсызландыруга иреште.
Бүләкләү тантанасында иң яхшы дип табылган балалар төрле номинациядәге дипломнар белән бүләкләнде: иң яхшы медицина хезмәткәре, эксперт, оператив хезмәткәр, спецназчы. Абсолют җиңүчеләр булып беренче взвод танылды. Аларга наркотиклар әйләнеше контроле буенча федераль хезмәт Идарәсе җитәкчесе, генерал–лейтенант Фаяз Шабаевның рәхмәт хатлары тапшырылды. Рәхмәткә тәрбияче–офицерлар — башлангыч хәрби әзерлек укытучылары Р.Камалов, Р.Фазылов, Ф.Абдуллин, Л.Алеев та лаек булды. Аннан балалар һәм өлкәннәр бергәләп гитарага кушылып җыр башкарды.
Уен тәмам, тик ул балалар күңеленә җуелмаслык булып кереп калды. Уен барышында алар наркополиция сугышчысы булуның, халыкны наркоэпидемиядән саклауның тәҗрибә һәм акыл сорый торган мактаулы эш икәнлеген аңладылар. Кем белә, бәлки еллар узгач, кайберләре хезмәтләрен наркотикларга каршы көрәшкә дә багышлар әле.
Розалия
ЗИННӘТОВА