Син эшмәкәрме? Конкурска ашык

Син эшмәкәрме? Конкурска ашык
Эшмәкәрлек, һөнәрчелек — борынгыдан буыннан–буынга тапшырылып килүче кәсеп. Бүгенге заманда әлеге кәсепне җәелдерү өчен уңай шартлар тудырыла: тырыш, булдыклы, максатка ирешә торган кеше икәнсең, рәхим ит, үз эшеңне ач та, рәхәтләнеп эшлә.
Соңгы елларда эшмә-кәрләргә хөкүмәт тара- фыннан да караш уңай якка үзгәрде: эшеңне башлап җибәрү өчен проценты аз булган кредитлар бирелә, лизинг (шул ук кредит төре) буенча кирәкле җиһазлар, техника белән тәэмин итү һ.б. каралган. Эшмәкәрлек дөньясында яңалыклар күзәтелсә, ул шулай ук эшмәкәрләргә җиткерелә. Районыбызда да эшмәкәрлекне киң җәелдерү максатыннан төрле чаралар, җыелыш, киңәшмәләр еш уздырыла. Шушы көннәрдә андый рухтагы җыелышларның чираттагысы узды.
Очрашуга Татарстан Республикасы инвестицион үсеше агентлыгы җитәкчесе урынбасары Л.Сәетова, ТИСБИның кластер җитәк-чесе Р.Нәҗипов, маркетинг–сервис вәкиле (ул конкурста катнашу өчен документлар әзерләргә ярдәм итә) Р.Шәйхетдинов, брокер–финанс вәкиле (шулай ук документлар әзерләүдә ярдәм итүче) Д.Сафиуллина кайткан иде.
Район башкарма комитетының икътисад һәм финанс бүлеге мөдире З.Шәрәфетдинов әйтүенчә, район җирлегендә 1200 эшмәкәр хезмәт куя. Шулар арасыннан 319ы авыл хуҗалыгы продукциясе җитештерү белән шөгыльләнүчеләр. Алар, әледән–әле эшмәкәрлекне үстерү программасы нигезендә төрле конкурсларда катнашып, шактый гына уңышларга ирешеп киләләр. Ә уңыш — дәүләт тарафыннан лаеклы дип табылганнарны техника, җиһаз яисә акчалата бүләкләү яки шуларга лизинг, кредитлар ярдәмендә ия булу. Өч ел эчендә райондагы эшмәкәрләр, конкурсларда катнашып, 20 млн. сумнан артык лизинг алган.
Эшмәкәрләргә ярдәм итүне үз эченә алган “лизинг–грант” программасы буенча августның 10сыннан соң конкурска йомгак ясала- чак. Анда Татарстанда теркәлгән һәм эшчәнлеген алып баручы эшмәкәрләр катнашырга хокуклы. Аларның бизнес–планы 2 июльдән 5 августка кадәр кабул ителә. Программа буенча эшмәкәрләр алган җиһазларның (ферма, сөт, ит комбинаты җиһазлары һ.б.) күпмедер күләмдә процентын хөкүмәт кире кайтара. Субсидияләр түбәндәгечә биреләчәк: мәсәлән, бизнесын башлап җибәрүчегә (бер ел тирәсе эшләп килүче) дәүләт тарафыннан лизингның 40 проценты, максимум 1 млн. сумга кадәр кире кайтарыла, ә инде аягында нык басып эшләп килүче эшмәкәрләргә 30 процент күләмендә субсидия бирелә, андыйларга лизинг суммасы 3 млн.га кадәр кире кайтарылырга мөмкин. Тик шарты бар: эшмәкәрләрнең эшче урыннар булдыруы исәпкә алына һәм агросәнәгать комплексында, җитештерү тармагында эшләүчеләргә өстенлек биреләчәк. Р.Нәҗипов ТИСБИда эшмәкәрләрне белемнәрен күтәрү мөмкинлекләре белән таныштырып, кыска сроклы курсларга чакырды. Эшмәкәрләр укырга эшчеләрен дә җибәрә ала.
Эшмәкәр булып тумыйлар, аңа тормыш тәҗри-бәсе белән ирешергә кирәк, дисәләр дә, бу сүзләр дөреслеккә бик үк туры килеп бетмидер сыман. Чөнки, эшмәкәрлек ул — талант, ә талант инде кешенең тамырларында яши. Кешелек дөньясы эшлим, булдырам дип тотынучының хыялларын чикләмәскә, хөсетләнмәскә, киресенчә, мөмкин кадәр ярдәм итәргә тиеш. Районда җитештерү мәйданчыклары булдыру программасы тормышка ашырыла. Зур бина эчендә урнашкан кечерәк биначыкларны җитештерүдә куллану өчен сатып яисә арендага алырга мөмкин, бу очракта да бәянең берникадәр процентын дәүләт күтәрә. Димәк, эшмәкәр булырга теләүчеләргә яңа мөмкинлекләр ачылачак.
Розалия ЗИННӘТОВА