Сәйдәшлеләр бәйрәм итә

Сәйдәшлеләр бәйрәм итә
Сәйдәшев урамында ул көнне чын бәйрәм булды. Урам бәйрәме. Билгеле бер датаны үз эченә алып, хөкүмәт тарафыннан расланмаса да, татар халкының тарихи мирасын, матур гореф–гадәтләрен дәвам итүче һәм халык ярата торган күңелле чара ул.
Сирәк булса да кайбер авылларда оештырыла. Арча станциясендә дә үзенчә бер традициягә әверелеп бара һәм менә өченче тапкыр инде станциянең өченче урамында үтә.
— Ару–талуны белмәс, тынгысыз, сәнгатькә гашыйк зат — “Колос” мәдәният йорты директоры Нәсимә Гарифуллинаның иҗат җимеше бу. Нәсимә төрледән–төрле чаралар оештыра. Халык аларны яратып кабул итә. Нәсимәгә ярдәмгә ире Наил, уллары Рим белән Руслан, хәтта өлкән яшьтәге кайнанасы Кафия апа да килә, — диләр бертавыштан ул җитәкләгән “Яшь йөрәкләр” ансамбле җырчылары.
Бу юлы да урам бәйрәме Гарифуллиннар йорты каршында үтте. Тамашачы булыр дип ышанып ук бетмәгән идем, ялгышканмын, ул көнне бирегә яше–карты гына түгел, хәтта музыка тавышын ишетеп күрше урамнардан да халык җыелды.
— Һәр урамда өлкән яшьтәге әби–бабайлар бар. Алар концерт–спектакльләргә дә йөри, Сабантуйларга да бара алмый. Озын урамның бер башында яшәүчеләр арасында икенче башындагыларны еллар буе күрмәгәннәре бар. Менә шундыйлар өчен оештырдык без бу бәйрәмне. Бер–берсе белән очрашсыннар, күреп сөйләшсеннәр, рәхәтләнеп аралашсыннар, серләшсеннәр, бер уңайдан үзешчәннәребез чыгышын карап хозурлансыннар. Сезгә ошаса, кичегез матур узса, безгә дә күңелле, — диде Нәсимә Гарифуллина, урамдашларына мөрәҗәгать итеп.
Бәйрәм кичен үзенең яраткан җыры белән яшь җырчы Гөлназ Җәләлетдинова башлап җибәрде. Аннан Арча педагогика көллиятеннән Флера Шакирова урамнары исемен йөрткән Салих Сәйдәшевның тормышы һәм иҗаты белән таныштырды. “Яшь йөрәкләр” ансамбле башкаруында Арчабыз турындагы җыр бәйрәмнең гимны кебек яңгырады.
Бәйрәмне алып баручы Нәсимә Гарифуллина урамның иң мөхтәрәм кешеләрен — 90, 80 яшен тутыручыларны, озак еллар матур, тигез гомер итүчеләрне, шулай ук мәктәпне тәмамлап, олы тормыш юлына тәүге адымнарын ясаучы егетләр һәм кызларны, үзешчән сәнгатьтә актив катнашучыларны гына түгел, капка төпләрен чәчәккә күмеп, чиста, төзек тотучыларны да аерым–аерым исемләп атап үтте, өлкәннәргә бүләкләрен, күчтәнәчләрен тапшырды, үзешчәннәр үзләренең чыгышларын да аларга багышлады. Равил Габдрахманов, Зөлфия Яхина, Фирдүс Галиев, Гөлнәзирә Тимершәехова, Зөлфирә Габделбәрова (баянда Рәдиф Шәйдуллин), Ибраһим Сабировның җырлауларын, Әлфия Рәхимованың шигырь сөйләвен, Рая Фәтхуллинаның мөнәҗәт укуын, Лилия Хәбибуллинаның ялгыз биюен һәм кызлар башкаруындагы “Чабата” биюен сәйдәшлеләр бик ошатты. “Яшь йөрәкләр” ансамбле җырлап кына калмады, түгәрәк уены да оештырды, олысын–кечесен биетеп тә алды.
Балалар өчен дә бу көнне чын бәйрәм үткәрелде. Ибраһим Сабиров алар өчен нинди генә бәйгеләр оештырмады. Чүлмәк тә ваттылар, йомырка салынган кашыкны авызларына кабып та йөгерделәр, таяк та тартыштылар...Ә җиңүчегә — тәмле бүләк!
Кыскасы, урам бәйрәмендә олылар да, яшьләр, балалар да рәхәтләнеп күңел ачты. Ул караңгы төшкәнче дәвам итте.
— Халык бәйрәмне ошатты — бу безнең өчен үзе зур шатлык. Киләчәктә станциянең башка урамнары халкына да шундый кичләр бүләк итәргә планлаштырабыз. Янып–көеп йөргән сәхнә ветераннарыбыз булганда, барын да оештырырга була. Рәхмәт, аларга, — диде соңыннан Нәсимә Гарифуллина.
Гөлсинә ЗИННӘТОВА