Элеваторда да урак өсте

Элеваторда да урак өсте
Авыл халкы өчен җәйнең иң мәшәкатьле, тыгыз, иң бай вакыты. Бакчаларда җиләк–җимеш өлгерсә, кырларда инде сап–сары булып игеннәр җәйрәп ята.
Узган атнада районыбызның күп кенә хуҗалыклары, күрше–тирә районнар уракка төште һәм суктырылган гәрәбәдәй игеннәрен ашлык кабул итү пунктларына озата башлады. Арча элеваторында да беренче килгән олауны кабул иткәннән соң, күңелле дә, мәшәкатьле дә эш башланды.
Бирегә икмәк тулы машиналар берничә районнан агыла. Питрәч, Әтнә, Арча районнары беренче көннәрдән — 20 июльдән үк тапшыра башлады инде. Әлегә арыш, борчак, арпа культуралары килә. Ашлык кабул итүгә әзерләнү элеваторда ашлык беткәннән соң ук башлана. Даими эшләүче 100дән артык кеше биредә ел буе әзерләнүдә көч куя. Быелгы урып–җыю чорына өстәмә 30лап кеше алганнар. Элеваторның 75 мең тонна ашлык кабул итәргә мөмкинлеге бар. Бүген биредә 4 ашлык киптергеч, берничә күтәртү механизмы эшли. Ашлык төяп килгән “КамАЗ”ларны, өстәмә арбалары белән бергә бернинди каршылыксыз бушатып җибәрәләр. Машиналар килүгә, иң элек ашлыкны лабораториядә анализга тапшыралар, аннан электрон үлчәүгә керәләр. Ашлыкның күләме компьютерга язылып сакланып калына. Аннан машиналар, бушату участогында ашлыкны бушатканнан соң, яңадан үлчәү аша уза. Бушату өчен 12–15 минут вакыт кирәк. Биредә хезмәт, нигездә, механикалаштырылган: бушатылган ашлык машиналар ярдәмендә киптергеч агрегатына килә, анда көрәк белән бераз кәшәләп, карап торырга кирәк. Аннан киптерелгән ашлыкны складларга озаталар. “Быелгы ашлыкның сыйфаты әйбәт, чүпле дә түгел. Дымлылыгы уртача 16–17 процент”, — дип уңай фикерләре белән уртаклашты баш инженер Данис Гайфуллин.
Элеваторда икмәкнең кадерен белгән, тәҗрибәле кешеләр эшли. Производство җитәкчесе Мулланур Хәлиуллин озак еллар эшен намус белән башкара, кул астындагы эшчеләре белән дә бер–берсен аңлап хезмәт итәләр. “Киптергечтә эшләүче Владимир Ращенко, Дамир Рәхимов, Фоат Бакиров, ашлыкны кабул итеп, киптерү агрегатында эшкәртеп, складка салып кую эшләрен башкаручы Мөршидә Җаббарова, Венера Хәйруллина, Резидә Әскәрова, Гөлира Әхмәтгалимова, Рабига Минһаҗева кебек тырыш хезмәткәрләр булганда хезмәтне нәтиҗәле итеп башкарып була”, — ди ул.
Әле уракның башы гына, алар кулыннан урак тәмамланганчы бик күп бөртек үтәчәк. Һәркем алдында килгән ашлык йөгенә куанып, бөртеген дә әрәм итмичә эшкәртеп урнаштыру бурычы тора.
Розалия ЗИННӘТОВА