Бозау урлаган өчен җәза

Бозау урлаган өчен җәза
2012 елның 28 маенда РФ Эчке эшләр министрлыгының Арча районы буенча полиция бүлеге дежур частена Татар Кәдрәге авылы янындагы болында бәйләп куелган үгез бозауның көпә–көндез югалуы турында хәбәр килде.
Шул ук көнне әлеге факт буенча җинаять эше кузгатылды һәм тикшерү башланды.
Тикшерү ачыклаганча, Казанда яшәүче Виталий Лукоянов 28 майда 16 сәгать тирәсендә “УАЗ” автомашинасында Казан — Малмыж юлыннан үтеп барышлый Татар Кәдрәге авылында яшәүчеләрнең терлекләре көтүдә йөргән болында туктый. Кеше–мазар күренмәүдән файдаланып, карак бәйдәге бер бозау янына килә, пычагын алып аны чала, итен, машинага салып, Казан шәһәренә алып китә.
Урланган бозау Ф.Әхмәдуллина хуҗалыгыныкы була, аңа 14400 сум матди зыян килә.
Суд В.Лукояновны чит кеше милеген урлауда гаепле дип тапты һәм РФ Җинаять Кодексының 158нче маддәсенең “В” пунктының 2нче өлеше буенча хезмәт хакының 20 процентын дәүләт файдасына тоту белән 1 ел 6 айга төзәтү эшләренә хөкем итте. Килгән зыян хөкем ителүчедән зарар күрүче файдасына тулысынча эзләп алынды.
Милекне саклау турындагы законнарның үтәлеше торышын анализлау күрсәткәнчә, 2012 елда шәхси хуҗалыклардан да, авыл хуҗалыгы предприятие-ләреннән дә мөгезле эре терлек урлау очраклары ешайды. Милекчеләр тарафыннан терлек һәм башка милек урлау-ны булдырмау чаралары күрелми.
Хәзерге вакытта “Вамин–Арча”, “Вамин–Мәрҗани”, “Татарстан”, “Игенче” ширкәтләре фермаларыннан мөгезле эре терлекләр урлаучыларны ачыклау буенча оператив–эзләү чаралары үткәрелә.
Шушы көннәрдә район прокуратурасы 2012 елның май–июнь айларында “Арча” агрофирмасы” фермаларыннан 105350 сумлык 9 бозау урлау турындагы җинаять эше буенча гаепләү нәтиҗәсен раслады. Әлеге эш буенча 2 кешегә гаепләү белдерелде, аларның берсе, элек хөкем ителгән ир, сак астына алынды.
Җинаять эше судка җибәрелде.
Радик ХӘБИБУЛЛИН,
район прокуроры урынбасары