Өлгерләр төгәлләү алдында

Өлгерләр төгәлләү алдында
9 августка район басуларындагы игеннәрнең 71 проценты суктырылды. “Курса МТСы”, “Ватан” хуҗалыкларында урак төгәлләнү алдында.
“Акчишмә” ширкәте урып–җыюны һәр елны беренчеләрдән булып төгәлли. Быел да эшне тиз тоталар. “Туксан гектарда бодай суктырасы калды”, — ди хуҗалык җитәкчесе Газинур Сафин.
Бодайга керешкәнче (өлгереп беткәнче) бер–ике көн сабыр итәргә булганнар. Әмма комбайнчыларга тик торырга вакыт юк — Энгель Сәйфетдинов трактор белән рулонлы саламнарны төяргә чыккан. Узган елгы запас шактый булса да, быелгысын да бик оешкан төстә җыялар. Шунда ук ташый да баралар. “Рулонлы килеш бер арбага бер эскерт салам сыя, — ди җитәкче. — Күпме ягулыкка экономия дигән сүз бит”.
Саламны халыкка да кирәк кадәр өләшәләр, солы саламы сораганнар — анысы да җитәрлек — рәхим итеп ал гына!
Энгель Сәйфетдиновның улы Айдар да комбайнчы. Бу көнне аңа ике бүләкне бергә алырга туры килде. “Бердәм Россия” партиясенең җирле бүлекчәсе башкарма комитеты җитәкчесе Тәлгать Җәләлетдинов бүлекчәнең политсовет секретаре Алмаз Назировның Рәхмәт хатын, акчалата премия һәм вымпел, яшьләр эшләре, спорт һәм туризм бүлеге җитәк-чесе Зиннур Сәгыйтов яшь механизаторга махсус бүләк тапшырды.
Әлеге ширкәттән Салават Мөхәммәтдинов та яшьләр эшләре, спорт һәм туризм бүлеге бүләкләренә лаек булды.
Алдынгы комбайнчыларны бүләкләү “Вамин–Мәрҗани” ширкәтендә дәвам итте. Биредә “Бердәм Россия” партиясенең җирле бүлекчәсе бүләгенә тәҗрибәле комбайнчы Азат Гомәров лаек булды. Яшьләр эшләре, спорт һәм туризм бүлеге бүләкләрен Айнур Мостафин (рәсемдә), Ленар Зарипов, Рүзәл Низамов, Рәмис Әхмәтшин алды.
— Ширкәтнең ярты игене безнең бүлекчәдә, — ди җитәкчесе Фаяз Әхмәдуллин. — Әле урып–җыясы шактый, эшнең тоткарлыксыз баруы куандыра, уңыш та ярыйсы чыга.
Район буенча бер гектардан уртача уңыш әлегә 29,2 центнер.
Иң күп уңышны “Кырлай” ширкәте ала — 35 центнер. “Игенче”дә — 33, “Ак Барс–агро”да 32 центнерга якын.
Тулай җыем — 920017 центнер.
8 августта басуларда 124 комбайнның 108е эшләде, бер комбайнга уртача 405,7 центнер ашлык суктырылды. “Кырлай”да — 796, “Ак Барс–агро”да 625 центнер туры килә.
Көзге чәчү өчен 25050 гектар җир әзерләнергә тиеш, шуның 22274 гектары әзер. “Аю”, “Вамин–Арча” ширкәтләрендә планны үтәү өчен шактый тырышасы бар.
Барысы 14541 тонна сабан культуралары орлыклары салырга кирәк. Шуның 8055 тоннасы (55 процент) салынган.
5932 гектарда (план 75897 гектар) туфракны төп эшкәртү үткәрелде. “Ватан”да 1100 гектарда эшкәртеп куйдылар инде.
Ильяс ФӘТТАХОВ