Сыйфатлы итеп төзе

Сыйфатлы итеп төзе
11 августта Татарстан Республикасы Президенты Рөстәм Миңнеханов видеоконференция режимында үткән киңәшмәдә социаль ипотека буенча төзелә торган торакның сыйфатына күбрәк игътибар бирергә кирәклегенә басым ясады. Президент киңәшмә башланганда аңа социаль ипотека буенча төзелгән торакның сыйфатсыз булуы турында күп мөрәҗәгатьләр килүен әйтеп үтте.
ТР Дәүләт торак инспекциясе җитәкчесе Сергей Крайнов хәбәр итүенчә, 2008 елдан башлап инспекциягә социаль ипотека фатирларында яшәүчеләрдән 148 мөрәҗәгать алынган. Инспекция тикшергәндә күп җитешсезлекләр ачылган. Иң киң таралган кимчелек — фатирларда тиешле микроклимат сакланмау сәбәпле стеналарның туңуы, нәтиҗәдә югары дымлылык, күгәрек барлыкка килә.
Рөстәм Миңнеханов ТР Дәүләт торак фонды директоры Тәлгать Абдуллинга төзелешкә контрольне көчәйтергә кушты. “Торак — сезнең активлар бит, аларны күзәтеп торырга кирәк, — диде ул. — Бу шулай ук район башлыкларына һәм төзүчеләргә дә кагыла”.
— Ничек кенә булмасын, бу – безнең зур җитешсезлек. Кимчелекләр булырга мөмкин, әмма аларны төзәтергә кирәк, — диде Президент. Ул социаль ипотека буенча төзелгән яңа торакның түбән сыйфатлы булуы өчен үзенә дә оят булуын әйтте. “Бу безнең җаваплылык зонасы. Әлеге торак — бүләк түгел — аның өчен кешеләр акча түли, шуңа күрә аңа караш та тиешенчә булырга тиеш”, — дип ассызыклады Президент.
ТР Президенты Дәүләт торак инспекциясенә җыйналган материалларны прокуратурага тапшырырга кушты.
Район башкарма комитеты җитәкчесе Илшат Галимуллин, киңәшмәне дәвам итеп, безнең районда социаль ипотека буенча торак төзелешенең киң колач белән алып барылуын әйтте. Шул ук вакытта сыйфат мәсьәләсе иң алгы планга куела. Муниципаль район башлыгы Алмас Назировның катгый таләбе дә бу. Төзүче оешмалар фатирларны тапшырганнан соң да аларда яшәүчеләр белән элемтәне өзмиләр, җитешсезлекләр барлыгы ачыкланганда аларны бетерү өстендә эшлиләр.
Муниципаль район башлыгы Алмас Назиров районда алып барылган башка төзелешләрдә дә сыйфатны ныклы контрольдә тота. 11 августта ул Арча шәһәренең 2 номерлы урта мәктәбендә ныклап төзеклән-дерүнең барышын караганда да иң беренче чиратта шуңа игътибар итте. Биредә “Арча КСМы” коллективы зур күләмдә эш башкарырга өлгергән, инде эчке эшләр тәмам. Район башлыгы күргәннәрдән канәгать калды. Шул ук вакытта үзенең киңәшләрен дә бирде.