Физкультурачы көнендә

Физкультурачы көнендә
Узган шимбәдә Арча стадионында Физкультурачы көне уңаеннан спорт ярышлары үткәрелде. Анда 24 мәктәп катнашты.
Спорт бәйрәмен район Советы башкарма комитеты җитәкчесе урынбасары Надия Мифтахетдинова ачты.
— Безнең районда спортка зур урын бирелә. Район гына түгел, республика, Россия, хәтта халыкара ярышларда җиңүчеләребез дә бар. Бу уңышлар тренерларның хезмәтенә дә зур бәя. Бүгенге ярышларда да сезгә җиңү шатлыгы телим, — диде ул, спортчыларга мөрәҗәгать итеп.
Надия Равилевна Лесхоз мәктәбенең физкультура укытучысы Илдар Шакировка, милли көрәш буенча Россия чемпионы әзерләгән тренер Фәнис Зариповка Татарстанның физкультура һәм спорт отличнигы күкрәк билгесе, гер күтәрү буенча тренер Мөдәрис Мөхәммәдиевка Татарстан Республикасының Яшьләр эшләре, спорт һәм туризм министрлыгының Мактау грамотасын тапшырды.
Ярышлар җәйге спорт төрләре буенча үткәрелде. Егетләр һәм кызлар велосипедта да узыштылар, роллерлы чаңгыларга да бастылар, роликлы тимераякларда да ярыштылар, йөгерделәр дә, стритбол һәм футбол, теннис та уйнадылар.
Җиңел атлетика буенча ярышларда иң җитезләр катнашты. Озынлыкка сикерүдә 7нче мәктәптән Фидарис Зиннәтуллин, Яңа Кенәрдән Эльфира Фазуллина беренчелекне алдылар. Йөгерүдә егетләрдән Алмаз Сәгыйтьҗанов (Арча), Адель Мөҗиповка (Арча педагогика көллияте) тиңнәр булмады, кызлардан Эльфира Фазуллина белән Илүзә Габдрахманова беренчелекне бирмәде. Катнаш эстафетада Арчаның икенче мәктәбе йөгерешчеләре җиңде.
Велосипедчылар ярышында “Олимп” балалар–яшүсмерләр спорт мәктәбеннән Ринат Зыятдинов, Илназ Ибәтуллин, Фәнизә Сәлахова, Өчиледән Алисә Гарипова, 5нче гимназиядән Рөстәм Абдуллин, икенче мәктәптән Ландыш Зәйнуллина финишка беренче килделәр.
Роликлы тимераякта ярышучылардан 1нче мәктәптән Асаф Баһавиев, Курса–Почмактан Таңсылу Шиһапова, Иске Кырлайдан Айрат Ситдыйков, Арча педагогика көллиятеннән Дилә Кәлимуллина берәүгә дә үзләрен узарга ирек бирмәделәр. Роллерлы чаңгыларда “Олимп” балалар–яшүсмерләр спорт мәктәбеннән Диләрә Фассалова, Александр Тиняков, 5нче гимназиядән Рөстәм Абдуллин, педагогика көллиятеннән Дилә Кәлимуллина беренчелекне алдылар.
Диләрә кечкенә буйлы булса да, барысына да өлгер. 1нче мәктәптә укый, быел алтынчы сыйныфка бара ул. Стадионда роллерлы чаңгыда йөргәнен күреп, тренер Рәис Камалов Диләрәне үзенә чакыра. Кыз ышанычын аклый. Бу юлы ул велосипедта да узышты, тимераякта да көчен сынады.
Стритбол буенча Арча кызлар җыелма һәм 5нче гимназия егетләр командалары беренче булды. Футболда Арча командасы пьедесталның иң югары баскычына күтәрелде. Тенниста беренче мәктәптән Булат Вәлиев, 5нче гимназиядән Гүзәл Зыятдинова, җиденче мәктәптән Булат Гәрәев, спорт мәктәбеннән Илүзә Заһидуллина җиңүгә иреште. Соңыннан җиңүчеләргә бүләкләр һәм дипломнар тапшырылды.
Гөлсинә ЗӘКИЕВА